Sastra Jawa

Program Digitalisasi Sastra Daerah

  • Increase font size
  • Default font size
  • Decrease font size

Pariminta, Pigeaud, 1953, #1405

Katalog:Pariminta, Pigeaud, 1953, #1405
Sambung:-

Pariminta

1. Pocung

1. mêndêm pocung wong anom tan mangan wuruk | waru jêne ngarga | jinada kang sabèng kawis | anêmaha dadi bajingan nèng praja ||

2. manggung dadya buron saparanipun |Kurang satu suku kata: manggung dadya buron ing saparanipun. sêkaring kintaka | tunjung bang kang gagang nginggil | yèn kacandhak rinante nèng tanah sabrang ||

3. pae lawan kasêngsêm manut pitutur | satriya Singgêla | dhukut arum sanèng ardi |

--- 4 : 13 ---

yèn wis bisa sinêbut janma sujana ||

4. bisa karya lêgane wong tuwanipun | gambir bang ngrêmbaka | kalabang markatèng ratri | sukarêna mêmuji jroning wardaya ||

5. lêstaria rahayu salaminipun | pamanguning jala | prabusèt kang sêkar putih | ngayomana marang kadang warganira ||

6. kang mêngkono kabul ing panêdhanipun | pêpatih Mandura | wrêksa lajêring padhati | awibawa katêkan barang sinêdya ||

7. aja nyipta sumêngah lawan têkabur | tambanging turôngga | punggawa Sri Bômapati | kalis marang ing wahyu lawan nugraha ||

8. têmahipun barang kang sinêdya luput | we wijil sing argaraga. | pandhita Ngendrakilardi |

--- 4 : 14 ---

dipun èngêt kang dadi bekaning raga ||

9. sayêktine gayuh tuna nyandhak luput | pamronggoling wrêksa | pêdhut samar ing pratiwi | ywa nênutuh ngamun-amun mring wong tuwa ||

10. nora wurung cilaka sajêge umur | garwa Sang Wisrawa | sêkar braja kang kinawi | kèsi-èsi nora amor lan sêsama ||

11. yèn mangkono sayêktine bêcik lampus | sabin tanpa toya | rêngganing wibawa mukti | anggêgawa mring wong tuwa kang minulya ||