Sastra Jawa

Program Digitalisasi Sastra Daerah

  • Increase font size
  • Default font size
  • Decrease font size

Murid, Padmasusastra, 1898, #1494

Katalog:Murid, Padmasusastra, 1898, #1494
Sambung:-

Murid

Javansch Ieerling

1. Kinanthi

1. dhuh siswa sumitraningsun | marma sira sun suruhi | prapta anèng ngarsaningwang | purwèngsun ngrungu pawarti | lamun sira wus linilan | tilik mring prajanta sami ||

2. rèhning panjênênganingsun | rumasa sira bantoni | pamulanging siswaningwang | kang tansah gilir gumanti | sakancanira sogata | kang wus lêbdèng pamarsudi ||

3. awit saking pakonipun | wantyanta sang maha muni | graning pawiyatèng Jawa | ing Surakarta nagari | Dr.Baca: dhoktor. Palmer kasumbaga | Van den Broek ingkang wêwangi ||

4. ing mêngko ta jênêng ingsun | nglairkên sukaning galih | myang dahat panrimaningwang | mring wantyanta sang ayogi | tuwin marang sira padha | kang wus bantu wèh wara di ||

5. saking rênane tyas ingsun | sumapala amaringi | lêlangên mring sira padha | têmbang tinumrapkên gêndhing | sanadyan kurang prayoga | mung

--- 304 ---

minôngka tandhaning sih ||

6. nihanta kang wus tinutur | ingsun aparing basuki | ing marga mring sira samya | pra siswa ingkang umulih | mring prajanta sowang-sowang | aywana sangsayèng margi ||

7. amung ta pamujiningsun | sapraptanira ing panti | panggih lawan yayah rena | myang kadakadang. warganta sami | suka rêna tur raharja | praptaning wêwangên nuli ||

8. ywa wiyang enggala wangsul | dèn ngrasa sira antuk sih | mring jêng guprêmèn Nèdêrlan | kang asung marganing bukti | tuwin marganing kamulyan | èstokna pitutur mami ||

9. titi panêmbramèng kidung | cinitrèng Anggara ari | limalas ingkang candrama | ing sasi Rabingulakir | taun Be sangkalanira | mangkat lunga ngèsthi siwi ||§ = 1800 [Sengkalan: mangkat lunga ngèsthi siwi (Sêlasa, 15 Rabingulakir 1800 A.J., Selasa, 4 Juli 1871 A.D.)].