Sastra Jawa

Program Digitalisasi Sastra Daerah

  • Increase font size
  • Default font size
  • Decrease font size

Prawira Adinagara, Pigeaud, 1953, #1425

Katalog:Prawira Adinagara, Pigeaud, 1953, #1425
Sambung:-

Panêmbrama dhumatêng Kangjêng Pangeran Arya Prawira Adinagara

1. Côndrawilasita

1. pantisewa candrama tanggaping warsa | wêwangsalan sinêkarkên surarêtna | gori wrêdha panênggak Hyang Girinata | kang minôngka nambrama kang wau prapta ||

2. krama wrêksa jarwa araning kang praja | Kangjêng Pangran Prawira Adinagara | rasa puspa nata wimba parisuka | ing Madura ingkang saking acangkrama ||

3. jarwa laga sudarma Sang Hyang Nurcahya | lawan Kangjêng Pangeran Gôndasiswara | parab Karna prajane Sri Basudewa | tuwin putra kêkalih saking Madura ||

4. purwa tanya wiku dyah nagri Jênggala | punapa ta sadaya sami raharja |

--- 4 : 130 ---

Madrim suta puspita arum kang gônda | kula bingah sukur dene tan sangsara ||

5. wrêksa krêsna gawar pangiringing mina | bilih parêng mugi paringa pawarta | minta darwa krama bênduning bêndara | kadospundi gèn paduka mêmariksa ||

6. dhepok raja panggrenda sranduning ngrangga | pasanggrahan ingkang sami urut marga | krawu patra kang wastra panglimut nendra | gudhung-gudhang tuwin êmul sadayanya ||

7. langsêp seta kang curi pinggir samodra | dhukuh dhusun pakarangan palakirna | taman desa gêndul pasagi kang warna | kêbon kopi punapa sae sadaya ||

8. saka palwa curiga agêm wanita | tiyang dhusun punapa têntrêm gêgriya | dêlêg wrêksa ciri asmaning nawala | wit punika tôndha sumrambahing arja ||

9. krai gora patih jaba ing Madura | ingkang môngka sêrananira gaota |

--- 4 : 131 ---

mulwa rêngka basa kawining nagara | karyanira kinarya anyanggi praja ||

10. wusing karya ancur gêdhah paku wrêksa | dados sami sarasa tumut anêdha | traju karsa nata baya kêdhung surya | saking adil mila sadaya rumêksa ||

11. ngajap karsa narendra Biraji praja | mila saking pangajêng-ajênging driya | laron seta pasiran kang sabèng rawa | kaprênatan ing têmbe mugi lulusa ||

12. côndrawela parabe Wisnu Bathara | titi purna cinitra ing ari Buda | cêngkir wana jawataning sasadara | sasi Sawal nêmlikur ingkang candrama ||

13. mancal toya parabe Sang Hyang Berawa | ing taun Dal sangkala ingkang winarna | mindêng cipta tanaya Pandhita Durna | pujanira barakan ngèsthi utama ||§ Taun Jawi 1807, taun Walandi 1887, wulan Oktobêr. [Sengkalan: pujinira barakan ngèsthi utama (Rêbo, 26 Sawal 1807 A.J.), sic. seharusnya: 1878 A.D., Kamis, 24 Oktober 1878 A.D.)].