Wara Ratna, Padmasusastra, 1898, #1348
Pencarian Teks
Lingkup pencarian: teks dan catatan-kakinya. Teks pencarian: 2-24 karakter. Filter pencarian: huruf besar/kecil, diakritik serta pungtuasi diabaikan; karakter [?] dapat digunakan sebagai pengganti zero atau satu huruf sembarang; simbol wildcard [*] dapat digunakan sebagai pengganti zero atau sejumlah karakter termasuk spasi; mengakomodasi variasi ejaan, antara lain [dj : j, tj : c, j : y, oe : u, d : dh, t : th].
Sêrat Wara Ratna
Kasambêtakên dados Wulang Putri.
--- 154 ---
1. Pocung
1. nêmbang pucung parlu mardi dibyèng kawruh | wruhing tatakrama | myang nistha madya utami | tumraping wong wanita salaminira ||
2. kang kalaku madya utama kapungkur | nistha ingkang kathah | tata nistha krama nisthip | arda darung kang ardane ngămbra-ămbra ||
3. saya kidhung widhung kau kiyal banjur | dènnya mrih utama | nanging nistha tuhunèki | ingkang madya utama ingaran nistha ||
4. ingkang nistha sinêngguh utama luhung | mulane kaardan | nisthane arda andadi | warah wuruk lumayua nunjang palang ||
5. sababipun lêkêt marang nisthanipun | madyane sru gila | utamane mlayu ngênthir | mung ki basah ni papa ingkang suwita ||
6. mring wong darung kang arda ing nisthanipun | tan wurung tuhunya | kênèng cinthung ni papèki | kaki basah masang kala mawa wisa ||
--- 155 ---
7. yèn tan emut suwitane kalihipun | wiwekane sirna | sarta wus pasthining Widhi | nistha arda kabanjur salama-lama ||
8. dhuh sutèngsun rungunên manira wuruk | kabèh kang tinitah | rèhning ta sira pawèstri | ingsun karya sanepa wêwulangira ||
9. ingsun cêkak supaya enggal dhinapur | nini putraningwang | èstokêna basa gati | basa wadon iku wadi têgêsira ||
10. milanipun wadi tan kêna kawêtu | kudu rinawatan | tan kêna lèh wèr ing kardi | dipun sami eling jênênging wanodya ||
11. têgêsipun wanodya wade puniku | upamane sinjang | dhasar alus ingkang mori | panggarape apik babarane brêgas ||
12. yêktinipun sêndhal akèh payunipun | pan datan sok wonga | ingkang nganggo jarit bêcik | yèn pinuju bêgja kagêm ing bêndara ||
13. sukur sèwu bisa kagêma ring ratu | iku upamanya | sira nini
--- 156 ---
dèn pakeling | upamane yèn wade morine ala ||
14. mori lumbu groboh ing panggarapipun | babarane ala | yêkti kang nganggo wong cilik | pirabara kalamun tiba wong desa ||
15. wani tuku malarangi rêganipun | yèn tiba sudagar | tan ana ajine pasthi | yèn kasêlak butuh dadi tanpa dadya ||
16. dhuh sutèngsun iyèku sanepanipun | sasmita kang nyata | ngong cêkak wêwulang iki | dèn èstokna rasaning srat Wara Ratna ||