Raffles: Surat dari Radèn Dipati Arya Rêksanêgara (Têgil, 23 April 1816)

--- [146] ---

From the Regent of Tagal

Atur sêrat kawula têtiyang sampeyan, Radèn Dipati Arya Rêksanêgara bupati ing nagari Têgil, kalih kawula ngaturi tabe kaormatan akathah-kathah, konjuk ing bawah kaos Sampeyan Kangjêng Tuwan Bêsar Ingkang Wicaksana Tomas Sêtamporêt Raplès, litnan gupêrnur ingkang angrèh ing pulo Jawi sêdaya, sêmangke ingkang kêrsa badhe kondur ing nêgari Engglan, ingkang mugi-mugi pinaosna ingkang yusya dening Allah, sarta wilujêng kaharjan ing salami-laminipun.

Sasampuning kawula ngaturi kasugêngan dalêm awiyos, kawula sampun tampi dhawuh dalêm sêrat, ingkang aparing uninga yèn ing mangke panjênêngan dalêm amanggih gêrah sawêtawis sangêt, dados kêrsa dalêm badhe kondur ing nagari Engglan, supados amanggih wilujêng ing panggenan ingkang asrêp, kalih dening panjênêngan dalêm dhawuhi uninga, yèn ing mangke tuwan ingkang anggantosi ing panjênêngan dalêm, sampun rawuh ing nêgari Batawiyah, anami Kangjêng Tuwan Jon Findhol,[1] ingkang sarta panjênêngan dalêm sampun amasrahakên ing panguwasa dalêm pulo Jawi sêdaya, punapa dening dhawuh pangandika dalêm aparing trima kasih dhatêng kawula sami, rèning[2] salaminipun panjênêngan dalêm angêsta pulo Jawi, andadosakên suka lêga ing galih dalêm,

--- [147] ---

sarta ingkang sakêlangkung asih dalêm dhatêng abdi-abdi dalêm, kang punika saking dhawuh dalêm ingkang dhumawuh ing kawula, sakêlangkung-langkung ing panuhun kawula, ingkang sarta ingkang abdi angraos botên wagêd amangsuli, saking sih dalêm dhatêng kawula ing salami-laminipun panjênêngan dalêm angêsta gupêrmèn pulo Jawi, botên langkung sêca tuhu kawula kimawon ingkang kawula caosakên, sênajan sampeyan dalêm sampun akondur saking pulo Jawi, inggih ugi kawula garitakên ing dalêm manah ingkang êning, saking sih wilasa dalêm ingkang sampun kawula panggih ing salami-laminipun, kalayan malih kawula ngaturi kasugêngan dalêm kondur saking pulo Jawi dhatêng ing nêgari Engglan. Mugi Gusti Allah aparinga wilujêng botên wontên satunggal prakawis, dumugia ing sakêrsa-kêrsa dalêm. Ing wêsana panjênêngan dalêm amaringi pratandha saking sih katrêsnan dalêm dhatêng kawula awarni wastra cêmêng, inggih sampun kawula tampi, sakêlangkung ing panuhun kawula, sarta botên mawi supe saking sih wilasa dalêm ing salami-laminipun.

Têtêgil kala tanggal ping 23 sasi April taun 1816.

Arya Rêksanêgara

[Tanda tangan]

Dipati Têgil.