Raffles: Surat dari Adipati Citrasoma (Tubin, Maret–April 1816)

--- [202] ---

From The Regent of Tauban

Punika sêrat ingkang mugi kaatur ing gusti kawula kangjêng tuwan ingkang agêng kang wicaksana, Tomas Sêtamporêt Raplès, kang sampun angrèh ing tanah Jawi sêdaya.

Wiyosipun kawula sampun tampi nuwala dalêm, kang kasêrat ing panagari Batawiyah tanggal ping 24 sangking sasi Rabiyulakir taun Dal 1743,[1] unglêle[2] sêrat panjênêngan dalêm aparing uninga ing kawula anyar-anyaran puniki, panjênêngan dalêm amanggih gêrah sangêt, satêngah abahan nilar dunya, ing sapunika panjênêngan dalêm angêrsakakên kondur dhatêng ing nêgari Elan,[3] supados amanggiha wilujêng, sangking dene batên[4] wontên sanès mêrgi pailaran kasêlamêtan, amung kesah ing nêgari kang asrêp. Kalih dene panjênêngan dalêm paring wuninga dhatêng ing kawula yèn sapuniki wontên satunggal Tuwan Inggris ingkang mulya nami Jon Pendhol,[5] sampun dhatêng ing panagari Batawiyah, awit sangking Bênggala kang gêntosi ing panjênêngan dalêm, sarta panjênêngan dalêm sampun amasrahakên dhatêng piyambêke, sêdantên panguwasa dalêm, ing tanah Jawi sabawahe sêdaya, inggih punika miturut tata pêrnatane ing nêgari Elan. Kalih dene malih sadèrènge panjênêngan dalêm mangkat saking nêgari Jawi, kêdah amêrtelakakên yèn panjênêngan dalêm sampun suka, sarta sampurna dhatêng para bupati, sangking dene kalêrêsane kêlampahane, kalih dene sabab sampun sêlamine amiturut sarta anuhoni ing tumêmêne manahe, punapa ing sakêrsane Kangjêng Gupêrmèn Inggris, ing salamine kaasta kuwasa ing tanah Jawi. Kalih dene malih sangking dene para bupati sampun acsring[6] apêpanggihan kêlayan panjênêngan dalêm, klayan kapênêdane, sarta aningalakên karilahane manahe, dados panjênêngan dalêm kathah panrima dalêm, dhatêng para bupati. Kalih dene malih ing kêlampahane tiyang-tiyang băngsa Jawi, anglangkungi sangking saene, sangking raosipun galih dalêm, sarta panjênêngan dalêm anglangkungi sangking asih, pramila panjênêngan dalêm ing slamine batên supe emut kimawon, yèn

--- [203] ---

saingga mêksiha pinaosakên ing yusya, panjênêngan dalêm langkung suka, yèn midhangêta kabar para bupati amanggih kauntungan, sarta kasênêngan, punapa malih dhatêng têtiyang Jawi sêdaya, batên wontên malih namung panjênêngan dalêm paring pakintun wêstra cêmêng ambrih dadosa tăndha katrêsnan dalêm, dhatêng para bupati.

Ing ngandhap punika atur kawula, Citrasoma, bupati nêgari Tubin, punapa ingkang sampun sami kasêbut paring dalêm sêrat, inggih sakêlangkung dening trima kasih, sarta asangêt-sangêt panuwun kawula, batên langkung pamuji kawula ing Gusti 'Allah mugi gèn panjênêngan dalêm amanggih gêrah nuntên amanggiha kawilujêngan. Mêkatên ugi namine kaluhuran, mugi kangjêng raja kantosa angagêngakên kapêrcadosan, ing panjênêngan dalêm, sarta amanggiha kalênggahan ingkang anglangkungi sangking kalênggahan dalêm ing tanah Jawi. Kêjawi sangking punika, batên langkung amêng kawula anyaosakên, sungkêm tabe ingkang katha-kathah[7] ing panjênêngan dalêm, sangking kawula abdi dalêm pun Adipati Citrasoma.

Nêgari Tubin tanggal ping ... sasi Jumadilawal 1743.[8]