Kawruh Petang, Warsadiningrat, 1920, #1447


[Kawruh Petang]

Ing ngandhap punika kawruh petang, bilih namakakên lare bayi, ing dintên sapêkênipun. Manawi nyukani nama sampun ngantos ngangge aksara, ka, ta, ba, ya,kêdah kasirik. Kawruh punika saking panjênênganipun Radèn Tumênggung Arungbinang, prayagung bupati pamajêgan gagatan ing Surakarta, petangipun kados ing ngandhap punika.

Lêgi, wetan. Aksaranipun ha na ca ra (ka).

Paing, kidul. Aksaranipun da ta sa wa la.

Pon, kilèn. Aksaranipun pa dha ja (ya) nya.

Wage, lèr. Aksaranipun ma (ga/ba) tha nga.

Kliwon, têngah. Aksaranipun A.

Bilih namakakên lare mêndhêt aksara lêrêse wêdalanipun, kapêndhêt ngajêng wingking.

Saupami wêdalan Wage, kanamakakên Marjana, mêndhêt aksara, ma, kalihan na.

ma – kapanggih 16 kapetang saking ha, na – kapanggih 2 kapetang saking ha ... gunggung kapanggih 18.

Lajêng kapetang makatên

ana 1, 5, 9, 13, 17 ... sae

têka 2, 6, 10, 14, 18 ... dhawah têka ... sae

lunga 3, 7, 11, 15 ... awon

sirna 4, 8, 12, 16 ... awon

Saupami wêdalan Kaliwon, kanamakakên U (U)tari, mêndhêt aksara A kalihan ra, (A kapanggih 1 ra kapanggih 4, gunggung 5) lajêng kapetang kados ing nginggil wau, dados dhawah: ana.

Pamilihipun ingkang prayugi dhawah têka utawi ana.

Kapèngêtan ing dintên Kêmis Wage tanggal kaping 8 Jumadilawal Jimakir 1850.

[tandatangan:M.Ng. Warsapradôngga]

Ing dintên Kêmis Kaliwon tanggal kaping 4 Mulud Jimawal 1853 M.Ng. Warsapradôngga, kakarsakakên mingsêr dados abdi dalêm mantri ordhênas nama M. Ng. Atmapanabuh, ing dintênipun Kêmis Wage tanggal kaping 29 Jumadilawal, taksih Jimawal kaparênging karsa dalêm kaparingan santun nama, Mas Ngabèi Atmamardawa.