Cênthini, Kamajaya, 1985–91, #761 (Jilid 06: Pupuh 365–367)

1.	Cênthini, Kamajaya, 1985–91, #761 (Jilid 01: Pupuh 001–023). Kategori: Kisah, Cerita dan Kronikal > Sêrat Cênthini.
2.	Cênthini, Kamajaya, 1985–91, #761 (Jilid 01: Pupuh 024–039). Kategori: Kisah, Cerita dan Kronikal > Sêrat Cênthini.
3.	Cênthini, Kamajaya, 1985–91, #761 (Jilid 01: Pupuh 040–057). Kategori: Kisah, Cerita dan Kronikal > Sêrat Cênthini.
4.	Cênthini, Kamajaya, 1985–91, #761 (Jilid 01: Pupuh 058–073). Kategori: Kisah, Cerita dan Kronikal > Sêrat Cênthini.
5.	Cênthini, Kamajaya, 1985–91, #761 (Jilid 01: Pupuh 074–087). Kategori: Kisah, Cerita dan Kronikal > Sêrat Cênthini.
6.	Cênthini, Kamajaya, 1985–91, #761 (Jilid 02: Pupuh 088–107). Kategori: Kisah, Cerita dan Kronikal > Sêrat Cênthini.
7.	Cênthini, Kamajaya, 1985–91, #761 (Jilid 02: Pupuh 108–125). Kategori: Kisah, Cerita dan Kronikal > Sêrat Cênthini.
8.	Cênthini, Kamajaya, 1985–91, #761 (Jilid 02: Pupuh 126–142). Kategori: Kisah, Cerita dan Kronikal > Sêrat Cênthini.
9.	Cênthini, Kamajaya, 1985–91, #761 (Jilid 02: Pupuh 143–158). Kategori: Kisah, Cerita dan Kronikal > Sêrat Cênthini.
10.	Cênthini, Kamajaya, 1985–91, #761 (Jilid 02: Pupuh 159–174). Kategori: Kisah, Cerita dan Kronikal > Sêrat Cênthini.
11.	Cênthini, Kamajaya, 1985–91, #761 (Jilid 03: Pupuh 175–190). Kategori: Kisah, Cerita dan Kronikal > Sêrat Cênthini.
12.	Cênthini, Kamajaya, 1985–91, #761 (Jilid 03: Pupuh 191–207). Kategori: Kisah, Cerita dan Kronikal > Sêrat Cênthini.
13.	Cênthini, Kamajaya, 1985–91, #761 (Jilid 03: Pupuh 208–223). Kategori: Kisah, Cerita dan Kronikal > Sêrat Cênthini.
14.	Cênthini, Kamajaya, 1985–91, #761 (Jilid 03: Pupuh 224–238). Kategori: Kisah, Cerita dan Kronikal > Sêrat Cênthini.
15.	Cênthini, Kamajaya, 1985–91, #761 (Jilid 03: Pupuh 239–256). Kategori: Kisah, Cerita dan Kronikal > Sêrat Cênthini.
16.	Cênthini, Kamajaya, 1985–91, #761 (Jilid 04: Pupuh 257–272). Kategori: Kisah, Cerita dan Kronikal > Sêrat Cênthini.
17.	Cênthini, Kamajaya, 1985–91, #761 (Jilid 04: Pupuh 273–281). Kategori: Kisah, Cerita dan Kronikal > Sêrat Cênthini.
18.	Cênthini, Kamajaya, 1985–91, #761 (Jilid 04: Pupuh 282–293). Kategori: Kisah, Cerita dan Kronikal > Sêrat Cênthini.
19.	Cênthini, Kamajaya, 1985–91, #761 (Jilid 04: Pupuh 294–308). Kategori: Kisah, Cerita dan Kronikal > Sêrat Cênthini.
20.	Cênthini, Kamajaya, 1985–91, #761 (Jilid 04: Pupuh 309–321). Kategori: Kisah, Cerita dan Kronikal > Sêrat Cênthini.
21.	Cênthini, Kamajaya, 1985–91, #761 (Jilid 05: Pupuh 321–332). Kategori: Kisah, Cerita dan Kronikal > Sêrat Cênthini.
22.	Cênthini, Kamajaya, 1985–91, #761 (Jilid 05: Pupuh 333–349). Kategori: Kisah, Cerita dan Kronikal > Sêrat Cênthini.
23.	Cênthini, Kamajaya, 1985–91, #761 (Jilid 05: Pupuh 350–352). Kategori: Kisah, Cerita dan Kronikal > Sêrat Cênthini.
24.	Cênthini, Kamajaya, 1985–91, #761 (Jilid 05: Pupuh 353–355). Kategori: Kisah, Cerita dan Kronikal > Sêrat Cênthini.
25.	Cênthini, Kamajaya, 1985–91, #761 (Jilid 05: Pupuh 356). Kategori: Kisah, Cerita dan Kronikal > Sêrat Cênthini.
26.	Cênthini, Kamajaya, 1985–91, #761 (Jilid 06: Pupuh 357–358). Kategori: Kisah, Cerita dan Kronikal > Sêrat Cênthini.
27.	Cênthini, Kamajaya, 1985–91, #761 (Jilid 06: Pupuh 359–361). Kategori: Kisah, Cerita dan Kronikal > Sêrat Cênthini.
28.	Cênthini, Kamajaya, 1985–91, #761 (Jilid 06: Pupuh 362–364). Kategori: Kisah, Cerita dan Kronikal > Sêrat Cênthini.
29.	Cênthini, Kamajaya, 1985–91, #761 (Jilid 06: Pupuh 365–367). Kategori: Kisah, Cerita dan Kronikal > Sêrat Cênthini.
30.	Cênthini, Kamajaya, 1985–91, #761 (Jilid 06: Pupuh 368–372). Kategori: Kisah, Cerita dan Kronikal > Sêrat Cênthini.
31.	Cênthini, Kamajaya, 1985–91, #761 (Jilid 07: Pupuh 373–376). Kategori: Kisah, Cerita dan Kronikal > Sêrat Cênthini.
32.	Cênthini, Kamajaya, 1985–91, #761 (Jilid 07: Pupuh 377–382). Kategori: Kisah, Cerita dan Kronikal > Sêrat Cênthini.
33.	Cênthini, Kamajaya, 1985–91, #761 (Jilid 07: Pupuh 383–384). Kategori: Kisah, Cerita dan Kronikal > Sêrat Cênthini.
34.	Cênthini, Kamajaya, 1985–91, #761 (Jilid 07: Pupuh 385–388). Kategori: Kisah, Cerita dan Kronikal > Sêrat Cênthini.
35.	Cênthini, Kamajaya, 1985–91, #761 (Jilid 07: Pupuh 389–403). Kategori: Kisah, Cerita dan Kronikal > Sêrat Cênthini.
36.	Cênthini, Kamajaya, 1985–91, #761 (Jilid 08: Pupuh 404–427). Kategori: Kisah, Cerita dan Kronikal > Sêrat Cênthini.
37.	Cênthini, Kamajaya, 1985–91, #761 (Jilid 08: Pupuh 428–443). Kategori: Kisah, Cerita dan Kronikal > Sêrat Cênthini.
38.	Cênthini, Kamajaya, 1985–91, #761 (Jilid 08: Pupuh 444–456). Kategori: Kisah, Cerita dan Kronikal > Sêrat Cênthini.
39.	Cênthini, Kamajaya, 1985–91, #761 (Jilid 08: Pupuh 457–477). Kategori: Kisah, Cerita dan Kronikal > Sêrat Cênthini.
40.	Cênthini, Kamajaya, 1985–91, #761 (Jilid 08: Pupuh 478–506). Kategori: Kisah, Cerita dan Kronikal > Sêrat Cênthini.
41.	Cênthini, Kamajaya, 1985–91, #761 (Jilid 09: Pupuh 507–526). Kategori: Kisah, Cerita dan Kronikal > Sêrat Cênthini.
42.	Cênthini, Kamajaya, 1985–91, #761 (Jilid 09: Pupuh 527–547). Kategori: Kisah, Cerita dan Kronikal > Sêrat Cênthini.
43.	Cênthini, Kamajaya, 1985–91, #761 (Jilid 09: Pupuh 548–567). Kategori: Kisah, Cerita dan Kronikal > Sêrat Cênthini.
44.	Cênthini, Kamajaya, 1985–91, #761 (Jilid 09: Pupuh 568–583). Kategori: Kisah, Cerita dan Kronikal > Sêrat Cênthini.
45.	Cênthini, Kamajaya, 1985–91, #761 (Jilid 09: Pupuh 584–599). Kategori: Kisah, Cerita dan Kronikal > Sêrat Cênthini.
46.	Cênthini, Kamajaya, 1985–91, #761 (Jilid 10: Pupuh 600–607). Kategori: Kisah, Cerita dan Kronikal > Sêrat Cênthini.
47.	Cênthini, Kamajaya, 1985–91, #761 (Jilid 10: Pupuh 608–614). Kategori: Kisah, Cerita dan Kronikal > Sêrat Cênthini.
48.	Cênthini, Kamajaya, 1985–91, #761 (Jilid 10: Pupuh 615–618). Kategori: Kisah, Cerita dan Kronikal > Sêrat Cênthini.
49.	Cênthini, Kamajaya, 1985–91, #761 (Jilid 10: Pupuh 619–626). Kategori: Kisah, Cerita dan Kronikal > Sêrat Cênthini.
50.	Cênthini, Kamajaya, 1985–91, #761 (Jilid 10: Pupuh 627–637). Kategori: Kisah, Cerita dan Kronikal > Sêrat Cênthini.
51.	Cênthini, Kamajaya, 1985–91, #761 (Jilid 11: Pupuh 638–651). Kategori: Kisah, Cerita dan Kronikal > Sêrat Cênthini.
52.	Cênthini, Kamajaya, 1985–91, #761 (Jilid 11: Pupuh 652–665). Kategori: Kisah, Cerita dan Kronikal > Sêrat Cênthini.
53.	Cênthini, Kamajaya, 1985–91, #761 (Jilid 11: Pupuh 666–671). Kategori: Kisah, Cerita dan Kronikal > Sêrat Cênthini.
54.	Cênthini, Kamajaya, 1985–91, #761 (Jilid 11: Pupuh 672–678). Kategori: Kisah, Cerita dan Kronikal > Sêrat Cênthini.
55.	Cênthini, Kamajaya, 1985–91, #761 (Jilid 11: Pupuh 679–690). Kategori: Kisah, Cerita dan Kronikal > Sêrat Cênthini.
56.	Cênthini, Kamajaya, 1985–91, #761 (Jilid 12: Pupuh 691–694). Kategori: Kisah, Cerita dan Kronikal > Sêrat Cênthini.
57.	Cênthini, Kamajaya, 1985–91, #761 (Jilid 12: Pupuh 695–703). Kategori: Kisah, Cerita dan Kronikal > Sêrat Cênthini.
58.	Cênthini, Kamajaya, 1985–91, #761 (Jilid 12: Pupuh 704–707). Kategori: Kisah, Cerita dan Kronikal > Sêrat Cênthini.
59.	Cênthini, Kamajaya, 1985–91, #761 (Jilid 12: Pupuh 708). Kategori: Kisah, Cerita dan Kronikal > Sêrat Cênthini.
60.	Cênthini, Kamajaya, 1985–91, #761 (Jilid 12: Pupuh 709–722). Kategori: Kisah, Cerita dan Kronikal > Sêrat Cênthini.

Citra

Terakhir diubah: 07-08-2021

Pencarian Teks

Lingkup pencarian: teks dan catatan-kakinya. Teks pencarian: 2-24 karakter. Filter pencarian: huruf besar/kecil, diakritik serta pungtuasi diabaikan; karakter [?] dapat digunakan sebagai pengganti zero atau satu huruf sembarang; simbol wildcard [*] dapat digunakan sebagai pengganti zero atau sejumlah karakter termasuk spasi; mengakomodasi variasi ejaan, antara lain [dj : j, tj : c, j : y, oe : u, d : dh, t : th].

365. Gambuh

1. Tan dangu nulya rawuh | ingkang ngiring kèndêl anèng tarub | apan maksih adhêkêt jèjèr apipit | têpung gêlang sarwi ngantu | salawatan salin lagon ||

3. Ganti sauranipun | apan laila lailalahu | Mukammad Rasullolah

--- 6 : 153 ---

asrakal-badri | ngalêna pakhtapat minhul | buduru misla hulnêko[2] ||

4. Mara ilana katu | ya wajha sururi anta samsu | anta badru anta nuru pokanuri | anta iksiru wa ghalu | anta misbahusuduro[3] ||

5. Wau ta ingkang rawuh | lajêng tumamèng jro wismanipun | lênggah têngah pajangan kang sinèta di | kadi duk papanggihipun | patêmbayaning patêmon ||

6. Jalwèstri sadayèku | wus tata dènnira sami lungguh | miwah ingkang salawatan para santri | asrakalira gya suwuk | sadaya wus sami lunggoh ||

7. Anèng pandhapa têpung | jèjèr dhêdhêkêtan adu dhêngkul | Kyai êmban Kêrtiraga anjêjagi[4] | ngatak kasinomanipun | ngladèni pawohan rokok ||

8. Sinaoskên ing ngayun | èpok gembol wêr tapsirihipun | bokor panjang-ilang winungkus waradin | sadaya wus nginang udud | ting kalêmpor wênèh nocoh ||

9. Sarwa wedang wus cukup | nulya sugata kêndhuri mêtu | pangajêng ambêng sêkul nèng panjang giri | sarta lan rampadanipun | nulya ancak kang digotong ||

10. Gotong-pat angêndhukur | rolas ambêng pinasang (m)barêngkut | jabèng jro wus waradin lêladènèki | Jèngraga nanjakkên wuwus | suwawi sami tuturoh ||

11. Nulya sami wiwisuh | wijik wanting ngumbah tanganipun | adan lêkas sadaya sami abukti | ulam ingkang wutuh-wutuh | bêkakak wêdhus lan opor ||

12. Bêsngèk pitik bêtutu | sabên ambêng ulame kang wutuh | kang ngalihi mapati kang nyapuluhi | wradin jangan bècèk wêdhus | samya jang takir gadêbog ||

13. Kang nadhah sami thêkul | andêngèngèk kudhi kongsi wungkuk | nora ketang saking kilèn mêntas bukti | tur sami anutug tuwuk | prandene maksih asèrob ||

--- 6 : 154 ---

14. Mangkana pan wus dangu | dènnira sami nadhah anutug | aluwaran sadaya kang sami bukti | kêndhuri gya kinèn ngêdum | wus warata kinaroso ||

15. Santri raryalit kumpul | wus dèn-kêlumuhi sring sok rusuh | pinisah lan santri tuwa sakêndhuri | anèng sajabaring[5] tarub | rusuhe nora kêpagol ||

16. Luwaran sadaya wus | ing jro dalêm sira sang linuhung | ingaturan têturuh mring Rarasati | kapat samya nadhah kêmbul | sadaya nulya wiwisoh ||

17. Dan lêkas bukti wau | sakathahe parèstri sadarum | pan pakantuk dènnira sami abukti | Amongraga tan pakantuk | tyasira tansah arikoh ||

18. Cêcêlakan pra arum | sajroning galih tan mawi sukur | yèn ta sampun kapopohan pinangantin | tan bêtah saêncèk lungguh | saking kal dènnya wus lunggoh ||

19. Namung nimbangi tanduk | sarat ngecani sêsaminipun | angsal limang kêpêl atobe (n)drêwili | daya gêdheya kang puluk | kêpêle sajaha tepos ||

20. Sawarni ulamipun | nanging tan ana ingkang dinumuk | namung paru kang ginigit sacuwil thil | adangu angantu-antu | pra ri lungiting pasêmon ||

21. Rarasati agupuh | maring raka ngaturi tuturuh | Sèh Mongraga sigra dènnira wêwanting | kang garwa nuruhi kakung | sadaya kang para wadon ||

22. Nulya sami wiwisuh | ambêng cinarik binagi gupuh | binrêkatan waradin kang para èstri | sinungkên ing rencangipun | sadaya samya (ng)gêgendhong ||

23. Linorod ambêngipun | panjang piring rampadan ingundur | saji dhêdharan sumaji anèng ngarsi | sarta lan pateyanipun | mêmanisane nèng tenong ||

24. Wusnya mangkana wau | Jayèngraga nèng pêndhapanipun | angandika sadaya mring para santri | prayoga bubar karuhun | rêbut ngabêkti Hyang Manon ||

--- 6 : 155 ---

25. Mahrib aywa kasusu | yèn wus bakda Ngisa wae wangsul | kang liningan sadaya kang para santri | sudagar lan magêrsantun | tur sandika nulya bodhol ||

26. (n)Jabèng jro èstri jalu | sasarêngan sowang-sowang mantuk | raka lawan para paman datan mulih | kalawan kyai pangulu | kalawan kang para bagor ||

27. Jèngraga malih muwus | Jamal Jamil dèn-kêparêng ngayun | kang sinung ngling gupuh marêk anèng ngarsi | Jèngraga bibisik muwus | sun jaluk gunamu roro ||

28. Wurukên Surat Sênu | Widiguna Crêmasana iku | ngèlmu pêngeraman mangunah ripangi | warahana kang sumurup | mangsa bodhoa wong roro ||

29. Mrih gawok wong kang (n)dulu | apa kang dadi adi-adimu | iya wurukêna mring wong papat iki | sira sun-dadak gunamu | kanggo sêlawatan mêngko ||

30. Jamal Jamil umatur | botên sagêd kawula wong busuk | kaping kalih ajrih rakanta mênawi | dados ing dudukanipun | mring kula kawula wêdos ||

31. Jèngraga naur wuwus | aja susah ya mêngko ngong munjuk | mring bêndaranira kangmas Amongragi | pan iku karêpku prêlu | mrih suka sanak tuwa nom ||

32. Sun ngalap brêkahipun | mring kakangmas Mongraga kang luhung | sira kang minangka wawakil sayêkti | Jamal Jamil lon umatur | yèn mêkatên (ng)gih kemawon ||

33. Sandika ing sakayun | Jèngraga ngling hèh ya Surat Sênu | Widiguna Crêmasana aywa kari | angguguwa sirèku |[6] marang Jamal Jamil kono ||

34. Kang sinung ngling umatur | nuwun sandika kalangkung sukur | angling malih wis mênyanga wismanèki | Widiguna bae kumpul | anutug lèhmu jêjandhon ||

35. Ki Jamal Jamil sampun | samya mundur mring ing wismanipun | Widiguna mangkana surya wis nitih | ing ancala manjing surup | nulya sakèhing para wong ||

--- 6 : 156 ---

36. Ge-age dènnya wêktu | mring patirtan ngambil toya wulu | ting karapyuk ngumbah tangan wisuh sikil | kang kêkêmu lagya raup | swarane pating salêmprot ||

37. Jèngraga wusnya cucul | siram suci angiras wuwulu | ngrasuk pêsalatan anggampar mring masjid | masjide piyambakipun | nulya santri adan gupoh ||

38. Sadaya tan acucul | lajêng kewala lajêng awêktu | Jayèngwèsthi wau ingkang angimami | kang rayi pra paman makmun[7] | myang santri samoting suro ||

39. Yata Kyai Pangulu | nèng pêndhapa dènnira awêktu | sarèrèhanira kang sami makmumi | sasisih kilèn (ng)gènnipun | sasisih wetan pra bagor ||

40. Jayèngwèsthi dènnya pêrlu |[8] sawusing Patekah suratipun | Kulya-ayu dene rêkangat kang ngakir | sawusing Patekahipun | Ida ja-a kang winaos ||

41. Tan pae lan pangulu | wêwacane surat Kulya-ayu | lawan Ida ja-a wêwacan yèn Mahrib | Sèh Mongraga dènnya wêktu | angimami para wadon ||

42. Gandhok kilèn (ng)gènnipun | langkung pasekat wêwacanipun | dhasar swaranira êmpuk rum amanis | sêdhêng sajake anganyut | kang makmum samya sumêdhot ||

43. Sami wêwacanipun | sawusing Patekah Kulya-ayu | Ida ja-a wusing Patekah kang akir | praptèng tahyat akiripun | iptitahira wis manggon ||

44. Nulya salam bakda wus | pupujian lêlagon swara rum | binarungan parèstri angasih-asih | lir rêbab suling calêmpung | gambang tan mawi kêndhang gong ||

45. Amelog rarasipun | langkung rahab sadaya kang makmum | lêlagone swara èstri langkung asri | sarwa lagon dhikiripun | wusnya dhikir (n)dodonga lon ||

--- 6 : 157 ---

46. Wus (n)donga limang wêktu | iman[9] ngijab asalam ngalekum | angabuli ngalèkum salam pra èstri | samya sunat bakdanipun | wusing sunat sami ngaos ||

47. Muhadam sarêng guyub | ting carêngkling swarèstri anganyut | Tambangraras Turida lan Rarasati | datan tumut ngaji amung | sunat wabin kang kinaot ||

48. Mongraga dènnya kasud | sunat wabin nêm rêkangatipun | tigang salam sawusing bakda anuli | tangat kiparat tawajuh | kalih salam bakda manggon ||

49. Amapanakên junun | pasang wirid isbaddiyahipun[10] | satariyah jalalah barjah amupit | pratingkahe timpuh wiyung | tyas napas kêncêng tan dhompo ||

50. Nulya cul dhikiripun | lapal la mujuda ilalahu | kang pinusthi datu wajibul-wujudi | winih napi isbatipun | pinatut tyas wus anggathok ||

51. Angguyêr kêpala nut | ubêding napi lan isbatipun | derah ing lam kang akir wit pusêrnèki | tinarik ngering mandhuwur | lapal ilaha angengo ||

52. Nganan pundhak kang luhur | anglêrêsi lapal ila nêngguh | pênjajahe kang driya mring napi gaib | ilalah isbat gaibu | ing susu kiwa kang ngisor ||

53. Nakirake wis brukut | lapal lailaha ilalahu | winot sèkêt kalimah sanapas nênggih | sanapas malih motipun | ilalah triatus manggon ||

54. Anulya lapal tuhu[11] | sanapas landhung winotan sèwu | pêmancate tyas lêpas lantaran dhikir | kewala mung wrananipun | muni wus tan ana raos ||

55. Wus wênang sadayèku | nadyan aa êê ii uu | sapadhane sadhengah-dhengah kang uni | unine puniku suwung | sami lawan orong-orong ||

--- 6 : 158 ---

56. Ing sanalika ngriku | coploking satu lan rimbagipun | dhewe-dhewe badan budine tan tunggil | nis mikrat suhul panakul | badan kantun lir gêlodhog ||

57. Tinilar lagya kalbu | yêktine napi puniku suwung | komplang nyênyêt jamaning mutêlak gaib | wus tan ana dharat laut | padhang pêtêng wus kawiyos ||

58. Pan namung ingkang wujud | wahya jatmika jroning gaibu | pan ing kono suhule dènnira mupid | tan pae-pinae jumbuh | nora siji nora roro ||

59. Wus tarki gya tanajul | mudhun sing wahya jatmika ngriku | aningali tan lawan netranirèki | dating Hyang kang Mahaluhur | patang prakara ing kono ||

60. Sipat jalalgaibu | jamal-kamal-kahar gaibipun | wusnya mijil saking gaib dènnya mupid | wiwit beda jinisipun | Gusti lan kawula rêko ||

61. Dating Gusti puniku | jalal-kamal jalal-kahar nêngguh | sipating kawula pan akadiyati | wahdat wakidiyatipun | alam arwah adsan[12] mêngko ||

62. Misal insan kamilu | bêdaning Gusti lan kawulèku | yêkti beda ingriku lawan ingriki | kêjaba kang wus linuhung | pratamèng kawruh kang wus wroh ||

63. Sawusira aluyut | lir antigan tumiba ing watu | pan kumêprah tyasira kagyat tan sipi | tumitah ing jamanipun | araling kula katongton ||

64. Luwaran dènnya suhul | angaringakên sanapas landhung | mot saklimah la ilaha ilalahi | nulya andêdonga sukur | sawusnya gya adan gupoh ||

65. Panjinging Ngisa wêktu | wusnya parèstri sunat sêdarum | nuli kamat Mongraga prêlu ngimami | wusing Patekah suratun | Inna anjalna winaos ||

--- 6 : 159 ---

66. Watini akiripun | praptèng tahyat awal akiripun | nulya salam awal akir bakda nuli | pupujian kadya wau | adhikir (n)donga Hyang Manon ||

67. Sawusnya gya para rum | sunat bakdiyatan sadaya wus | sunat minal-witri rakangatal-witri | wus pêragat sunatipun | sasalaman samya wadon ||

68. Anulya sami mundur | saking gandhok maring dalêm agung | kantun Nikèn Tambangraras lan Mongragi | anjênakkên dènnya kasud | sami mupidira karo ||

69. Kang salat anèng tajug | bakda lagya pêpujiyanipun | kang sêmbahyang nèng pêndhapa lagya dhikir | sauran kang anèng tajug | samya rahabe bêbyanton ||

70. Myang kiwa têngênipun | ing jawi lèr kilèn wetanipun | ingkang cêlak ragi têbah pan kapyarsi | arame swaranya umyung | mêwahi srining parungon ||

71. Wanci Ngisa bakda wus | Jayèngwèsthi Jayèngraga mudhun | saking salat sami pinarak pêndhapi | tan ewah lênggah lir wau | myang Pangulu tata lunggoh ||

72. Jayèngraga angrasuk | busana kadya duk siyangipun | namung salin kuluk kanigara brêji | asusumping cundhuk mêntul | tumanggal tarètès abyor ||

73. Lênggah pandhapanipun | wetane kang raka dènnya lungguh | tan adangu kang winêling samya prapti | sudagar jalwèstrinipun | santri magêrsari mring jro ||

74. Kêdhik ingkang tan rawuh | kathah kang sami prapta malêbu | sabab wus samya myarsa warta ing mangkin | Jayèngraga karsanipun | kasukan-sukan ing mêngko ||

75. Andhèr pandhapa têpung | tan kêliru gyaning urutipun | wus miranti sagogolonganirèki | wus pêpak sadayanipun | Jèngraga ngandika alon ||

76. Hèh Nuripin sirèku | si Surat Sênu wèhna si biyung | bocah roro iku konên mêmaèsi | kêmbarên pêrabotipun | ingkang sarwa di kinaot ||

--- 6 : 160 ---

77. Sarta lan sajènnipun | lan malih mundhuta trêbang wolu | sanga lan têrbangku pundhutên dèn aglis | kêndhang loro angklung pitu | kang liningan mentar gupoh ||

78. Angirit Surat Sênu | wus sinungkên ni Cerong kang biyung | dhinawuhan karsane ki Jayèngragi | Nyai Cerong wus sumurup | ngaturi Ni Daya gupoh ||

79. Nuripin mundur mêtu | mundhut trêbang kêndhang lawan angklung | tan adangu kang pinundhut katur ngarsi | myang têrbang pribadinipun | agême si macan garong ||

80. Datan antara wau | nJêng Kyai Bayi Panurta rawuh | lawan ingkang garwa sakucumbinèki | êting gêlas agêng ngayun | santri Luci sisinggah wong ||

81. Byak mire samya takut | kang lênggah sadaya sarêng mudhun | Ki Pangulu repot tan rikat ngudhuni | (n)Jêng Kyai ngling wis ywa mudhun | krengkangan têmên arikoh ||

82. Kablêndêrên wêtêngmu | dene kanti sêngguran napasmu | wis linggiha bae sira Basarodin | kang myarsa sami gumuyu | mring Pangulu repot rikoh ||

83. lajêng kewala masuk | mring dalêm yun apanggih lan mantu | Sèh Mongraga lan garwa mêthuk nèng ngarsi | nulya samya tata lungguh | mingsêr mire kang pra wadon ||

84. Sèh Amongraga gupuh | atur salam mring (n)Jêng Kyai wau | Kyai Bayi agêpah salamirèki | Nikèn Tambangraras ngujung | mring rama ibu wot sinom ||

85. Ni Malarsih andulu | mring kang putra tuwin ingkang mantu | sakamantyanira ring putra lir mami[13] | pandugining tyas kang ibu | kadya wus asmaraning don ||

--- 6 : 161 ---

366. Asmaradana

1. Sadaya kang para èstri | pan samya gawok tumingal | marang sang ro pinangantèn | cahyanya apindha wulan | sunarira tumeja | awingit jatmika ruruh | tajêm sêmune uliya ||

2. Ki Bayi ngandika aris | anakmas Sèh Amongraga | punapa karsa-a mangke | ningali dhikir singiran | kang putra lon turira | kewala kawula kantun | ningali saking jro wisma ||

3. Paduka prayogi mijil | ningali ripangi Karang | pun Jamal Jamil ing mangke | mêdalkên pangunahira | ingkang kalawan sunat | pan kathah pigunanipun | sakarsanta tan kacuwan ||

4. Ki Bayi gumujêng ngikik | kula mung myarsa pawarta | pun santri Luci kang omong | yèn pun Jamal Jamil sarwa | sagêd rêrekan guna | gabusan ripanginipun | anggawokakên wong kathah ||

5. Kang putra umatur inggih | sayêktos sagêd pun Jamal | Jamil duk maksih nèng kilèn | pangapuntên sapunika | manawi salong ical | kang rama gumujêng muwus | kintêne mangsa icala ||

6. Yèn mêkatên kula mijil | mring pandhapa yun uninga | pun Jamal Jamil rekane | kang putra matur sumangga | ngandika mring kang garwa | yayi sira yèn yun (n)dulu | umiringa ibu rama ||

7. Ningali si Jamal Jamil | ripangi anèng pêndhapa | kang ramèbu lon dêlinge | payo rara Tambangraras | sirèku kinalilan | sang ayu tyasnya kapencut | myat wong ripangi angojrat ||

8. Dhasar linilan ing laki | wêwah kinarsan bu rama | kalangkung dhangan karsane | lagya mingsêt padanira | karsa andhèrèk rama | sakala tyase sumênut | rumaos kapurbèng priya ||

9. Sang rêtna osiking galih | ya talah karêping hawa | ngarat kaluputaning wong | angrusak sangkribing kênya | anganyag wong jêlanah | dastu ngong ngwang tanpa urun | amêdhot talêring nalar ||

--- 6 : 162 ---

10. Mudadah[14] sabil anggalih | ya Allah astagpirolah | sanalika lêjar tyase | angêkêr netya kang timpang | tan labêt kawistara | pulih liringe lir wau | alon umatur ing rama ||

11. Ramèbu kawula naming | ningali ngriki kewala | kang rama mèsêm liringe | anyathêt jroning wardaya | ningali mring kang putra | ngandika lah ya wis sukur | ngong priyangga lan bunira ||

12. Ki Bayi anulya mijil | kalawan kang garwa putra | Turida Rarasatine | (n)Jêng Kyai praptèng pêndhapa | mingsêr sêdayanira | lênggah nèng kalasa batu | garwa putra nèng wurinya ||

13. Ing pandhapa wus miranti | dupa sasajèn mawarna | pêpak sadaya bon-abon | Kiyai Bayi Panurta | ingayap santri kathah | nyamping kêling limar biru | paningsête jingga mangsa ||

14. Rasukan jobah sêmbagi | dadu corak kayu anyang | kotang putih rus[15] kancinge | golok balongsong suwasa | pan têsbèhira mêrjan | dhêsthar bathik Arab alus | kuluk bathokan pèncèngan ||

15. Ki Bayi ngandika aris | marang putra kalihira | apa wus pêpak sajène | yèn uwis padha samêkta | prayogane lêkasa | pan manira arsa wêruh | ripangine Jamil Jamal ||

16. Putra kalih matur aris | pan inggih sampun sadaya | tan wontên kang dipunantos | lah ya wis mara bismillah | Jèngwèsthi Jayèngraga | ngatag lurah santri gupuh | kang samya nyandhak tarêbang ||

17. Jayèngwèsthi Jayèngragi | gus Arpani Amadasra | gus Jamjani lan Jalalèn | gus Dawud Nurjani Nurya | kalawan gus Murtaja | kang ngangklung santri pêpitu | kang angêndhang Tunjangkara ||

18. Lan Gandasana anuli | santri kang bawa narêbang | lêkas maca salawate | bawa singir sajak Jawa | lêlagon sêkar Lêmpang | anglik wong sasanga barung | swara mor gêng alit raras ||

--- 6 : 163 ---

19. La ilaha ilalahi | Muhamadun Rasulolah | nulya sinauran ing kèh | gumuruh sru swara rêmpak | trêbang sanga jêngguran | sarta kêndhange angguguk | sêsêg anduduk ing kêndhang ||

20. Pangroking angklung (ng)gêtêri | anggobyok trêbang sasanga | wor swara rug santri kabèh | têrbange kêmpyang akipyah | lah kêndhang atampèlan | imbal bêm gêdhug asêguk | angklung sêngkrak bêbagenan ||

21. Plak blang plak blang pong ping pong bring | bêm pung pung pêk dhêng dhung dhung gyag | tung plêk tung plêk pyak klur klur thèr | thur klung klung krak crir cir pyang pyang | kloklir byêng dhrêng thur thur brang | brang pêp pêp bah gur bah gur |[16] tong ting tong grug byêng grung grung brang ||

22. Gênturan gumuruh atri | kontrak wong sadesa pisan | kumêrut bêbantu nonton | mring prapat manca limanya | jalwèstri kèh kang prapta | jêjêl ing tarub supênuh | kang ningali rêbut papan ||

23. Rarywalit pating jalêrit | kapipit uyêl-uyêlan | dhêsêg-dhinêsêg rêbut (ng)gon | ingarah-arah wus tata | brêkate samya dènnya | mangkana dènnira talu | wus dangu antaranira ||

24. Nulya suwuk ingkang singir | maca salawat wong kathah | kaping tiga samya rèrèn | gupuh Ki (m)ban Kêrtiraga | angatak noman |[17] Nuripin Jalalodin wus | angirit laladènira ||

25. Pateyan tenongan ngarsi | pawingking tlam myang dhudhulang | wus pinrênah saurute | (n)Jêng Kyai Bayi Panurta | piyambak sinaosan | Malarsih lan putra mantu | wus sinaosan pateyan ||

26. Waradin sadayanèki | ngalihi nigani miwah | kang mapati sakathahe | nulya dhêdharan mangarsa | tan pae petangira | rampung lêladosanipun | Ki Bayi alon ngandika ||

27. Lah payo nak putu-mami | bismilah padha krana-Lah | tamba kasatan sakèhe | sasênêngira priyangga | sadaya tur sandika | samya dhadharan myang nginum | suka rêna ting kêcupah ||

28. Kang nèng wisma Sèh Mongragi | lan kang garwa Tambangraras | linadèn sêsaosane | di-adi dharan mawarna | Cênthini

--- 6 : 164 ---

tansèng ngarsa | Sèh Mongraga ris amuwus | ya yayi sira kantuna ||

29. Manirarsa manjing masjid | panêpèn tajug pungkuran | Tambangraras ris ature | kawula lamun kalilan | mung tumutur paduka | kang raka mèsêm lingnya rum | ya sukur alkamdulilah ||

30. Nulya kang rayi kinanthi | cèthi Cênthini tan têbah | nèng wuri angampil rukoh | sang ro wus praptèng ing langgar | anjujug ing patirtan | Tambangraras Cênthini wus | ngalap toyastuti samya ||

31. Sawusira asusuci | sira Ki Sèh Amongraga | masuk ing langgar panêpèn | wus sunat wulu tahyatal | -masjidi nulya tangat | tasbih rolas rêkangatu | nêm salam usalinira ||

32. Pinarêng niyat lan têkbir | wiwit usali tangatan | têsbihi rakangatine | lilahi tangala Allah | -hu-akbar kabiran wal | kamdulilahi kasirun | wa sub-kanallah bukratan ||

33. wa asilan nulya malih | inni wajahtu wajhial | liladi pataras rêke | samawati wala arla | hanipan wa musliman | wa mahyaya wa mamatu | ana minal musrikina ||

34. Sawusing wajah kang lirih | maca tasbih ping limalas | sadèrènging Patekahe | lapaling tasbih punika | awale ping limalas | subkanalahi wal kamdu | lilahi wa lailaha ||

35. Ilalahu Allah nênggih | hu-akbar lakolawala | kuata illa bilahèl | ngaliyil ngalim anulya | lirih maca Patekah | sawusing patekahipun | tasbèh malih ping sadasa ||

36. Arukuk sawusing têkbir | maca tasbih ping sêdasa | nulya iktidal adêge | sami alahu kuliman | kang midahu rabana | tasbih malih ping sapuluh | gya sujud wusing takbirnya ||

37. Ping sadasa maca tasbih | satangine sujudira | lungguh sawusing takbire | maca tasbih ping sadasa | sujud malih sadasa | ngandhêg wusing têkbiripun | maca tasbih ping limalas ||

38. Sawusing Patekah malih | maca tasbih ping sadasa | rukuk ping sadasa malih |[18] iktidal malih sadasa | sujud tasbih sadasa | lungguh tasbih ping sapuluh | sujud malih ping sadasa ||

--- 6 : 165 ---

39. Nulya lungguh tahyat sarwi | iptitah lan tumaninah | gya salam nganan ngeringe | tasbih ing dalêm sêsalam | ingetung kathahira | apan satus limangpuluh | gumulung rolas rêkangat ||

40. Ing dalêm nêm salam nênggih | gunggung sadaya têsbihnya | sangangatus ing kathahe | tan pae lan ingkang garwa | sami atasbih tangat | tuwin Cênthini kadyèku | tangat tasbih ing palilah ||

41. Langkung nikmatirèng galih | makmum tangat mring Mongraga | antara dangu salate | wus praptèng rolas rêkangat | tahyat akir iptitah | wusing bakda salam laju | tatrap junun wiritira ||

42. Rinakit pasanging dhikir | satariyah isbandiyah | barjah jalalah suhule | tinokitkên mring makripat | pêmancade maring kak | dêdalan tarki tanajul | layaping panaul pana ||

43. Wus lanyah lantaran dhikir | singsale nora rêkasa | kêjêb liyêpe wus lobok | mangkana Sèh Amongraga | wus coplok angganira | mingkup tan rênggang sarambut | muntu tanpa ambu rasa ||

44. Gumaluntung lir kaywa king[19] | badane wus tanpa karya | padha lawan rèmèh-rèmèh | muni lir unining wungwang | wus dhewe dhèwèkira | nora pisah nora kumpul | nulya nèng jaman ênêngan ||

45. Luyuting wilayat gaib | tan kêna kinaya ngapa | kang mêngkono kang wus jumboh | papane ahli oliya | Mongraga Tambangraras | katri Cênthini pan uwus | kasub masuk dènnya bengat ||

46. Sang ro katri lan Cênthini | gumuliling linèng layapan |[20] dadya saujur-ujure | kang samya nikmating pana | suhulira maring Hyang | kajênêkan dènnya kantu | yata kang anèng pêndhapa ||

47. Sapêngkêrira Mongragi | pan wus angsal kalih rambah | Nuripin Jalalodine | kang emprak kalangkung rahab | Ki Bayi suka-suka | miyat kang sumbu-sinumbu | wus dangu rèrèn mangkana ||

48. Kyai Bayi Panurta ngling | lamun wus aso bismilah | si Luci sapa [sa...]

--- 6 : 166 ---

[...pa] tandhinge | Jèngraga matur pun Tunjang | -kara tandhingnya emprak | lah mara lêkasa gupuh | si Luci lan Tunjangkara ||

49. Sandika kang putra kalih | nulya ngêlik wong sasanga | rêmpêg lagune kaboyong | swara sru landhung angêmbat | lailaha ilalah | hu rabana ya Alahu | kasbuna ya Allah nulya ||

50. Santri gêr kathah nampani | rampak gumêr tanpa rungwan | gora gêng alit tan wanèh | tarêbang ambata rêbah | angklung gumrah lir gêrah | kêndhange sêsêg anduduk | kêmpyange ngablak bêngkakak ||

51. Nulya emprak santri Luci | mèyèk lir anglangi ênggak | tangan karo nyêpêng corong | hebat kadya sêpat molah | emprake Tunjangkara | dhasar gêdhog ngiras badhut | kèh carane jogèdira ||

52. Ting salinthut sikutnèki | sikile kaya kapinjal | pepekohan acecekon | tangan ro coronge mubyar | prabot taksih têkêsan | Luci sih caraning kaum | jubah bêbathok jêplakan ||

53. emprake caraning santri | jumbul-jumbul saleyoran | gèsèh lawan gêndhingane | mung rujuk lan kalimahnya | lumrah emprak slawatan | mung mangkono kluyur-kluyur | seje lawan Tunjangkara ||

54. Megal-megol anarisik | tangan sêblak sêraweyan | rengkot-rengkot cara Regol | cangklakane palênthètan | wêtênge palêmbungan | ngulêt sumbu-sinumbu |[21] Ki Bayi asuka-suka ||

55. Kasoran ki santri Luci | apan kalah babrongotan | nyunyuk sakêna-kênane | cècèg-cinècègan wangnya | nèng salang mayang kandhutan |[22] gêni tanpa raosipun | mila rahab bêbakaran ||

56. Wus dangu antaranèki | gya suwuk maca sêlawat | nulya kêndêl sadayane | angiring-iring mêmangan | santri sayah kasatan | kang miyat masih kêmrusuk | (ng)gêguyu kang samya emprak ||

57. Nulya Nuripin kang prapti | angirit Sênu gus Surat | singgah sarwi (m)bêkta obor | sakèhe wong anêningal | apiyak ngering nganan | ting balêkèr samya kukuk | dubilah nora kêjamak ||

--- 6 : 167 ---

58. Wau kang pinindha èstri | amêpês sila panggungan | sarwa adi busanane | sinjang cindhe bang pêpradan | pêngasihe sandhungan | sak asta nêrampat pungkur | ciningkrang pawingkingira ||

59. Watês mêmêlan mawingkis | winidan jênar gêbêgan | dadya anglela kempole | sinamêkan bangun tulak | rinenda klengkam jênar | ngawêng singsêtane mungguh | ing pundhak pirit pungkuran ||

60. Bubuntar winiru apik | jèrèng tumumpang taliban | mancut sipat kêkodhoke | lir githoke (ng)gik-ênggikan | cêthik methok pinêkak | ing cathok trètès intên byur | pasingsêtan sutra jênar ||

61. Atumpal mêndhala giri | sebêt akace kumbaya | kusta lus abrit pinocot | kalpika lintring tajugan | mirah bang gêlang kana | anting-anting kêlat-bau | kalung badhong sungsun tiga ||

62. Sumping puspa krêsna rukmi | acundhuk mêntul tamengan | pakêncêng suri tinrètès | gêlung sêdhêng tinêngahan | ing grudha kanin nuntak | sinêkar roncèning gêlung | pinalipit ing anggitan ||

63. Sêngkang uliran hèr thathit | pêngajênge pinahyasan | mawi cithak cêcênthunge | pêtha thi-athi lêlatha | alis mênjangan milar | tasik rinêmbug sumunu | satêngu tan mantra priya ||

64. Sadaya gawok ningali | marang ro kang pinindha dyah | samya kasmaran sakèhe | Ki Bayi suka tumingal | gumujêng sarwi nabda | mangkono jawane iku | akale si Jayèngraga ||

65. Iku sapa kang maèsi | si Sênu lawan si Surat | Jayèngraga lon ature | punika pun Nini Daya | Ki Bayi mèsêm nabda | sasmita mring garwanipun | ya talah si bibi Daya ||

66. Bisa têmên karya adi | wong desa nora kaduga | maèsi kaya mangkono | Malarsih matur ing raka | mila pun bibi Daya | sabên tiyang kang mêmantu | tan liya pun bibi Daya ||

67. Ki Bayi ngandika aris | wis mara nuli lêkasa | Jèngraga nyandhak trêbange | Macan garongan ginêmbyang | angêlik wong sasanga | lêlagon Kinanthi tarub | tarub agung Allah Allah ||

--- 6 : 168 ---

68. Pangaubaning wong brangti | abrangti marang Pangeran | Pangeraning alam kabèh | sinauran santri kathah | gumuruh swara rampak | trêbang kêndhang lawan angklung | kadya gêrah ajêngguran ||

69. Nulya ngadêg ronggèng ngibing | wiwit ukêl bêbadhayan | antuk sarambah gongane | salin raras sarimpenan | pan angsal sarambahan | mêdhar cengkok ukêl lagu | nulya kêjêr gêgambyongan ||

70. Ronggèng kalih sarêng ngêlik | lir rêbab amathêt sanga | lan suling ênêm nyamlênge | siji lir gêtêring rêbab | amiwil ngêmbat kawat | kang siji lir gêtêripun | ing suling êlong tutupan ||

71. Angêlus tilêpan miwil | swara rum manis araras | rantas tyase kang myat kabèh | koyup mring Sênu gus Surat | kang saplak ing kalangyan | sindhèn lir sêsêndhon nganyut | têtela parikanira ||

72. Panjalin tulak ros langking | tratês[23] pita ing dharatan | tingalana rêragane | yeka purbaning Pangeran | obor têgal siluman | palêsthane ing pamuwus | aywa mangmang anèng donya ||

73. Yèn urip wêkasan pati | sandhang lawe among wohan | dene patrine wong pandhe | ling-lingên sariranira | ywa pijêr ngujar ujar | ya hu-Allah kuntul biru | dêruk seta ing Bênggala ||

74. Cêngak-cêngèk lir raryalit | nora pintêr anèng donya | mênyan seta upamane | ya ilahi jênu tawa | tiwasing uripira | pan katungkul lura-luru | dening sasmitaning netra ||

75. Dodotane wong pawèstri | ngulatana ingkang nyata | sampurnaning ngèlmu kabèh | wong gêmati kakècèran | kêlasa jinamang bang | eman-eman wong tumuwuh | yèn kêlakon mati bangka ||

76. Gudhe pandhak wong ngaurip | praja nèng kuranji ika | krondhahan papa têmahe | puspa ranu ya hu-Allah | swarane pra pujangga | uripira anglir tunjung | atuwuh tanpa têlaga ||

--- 6 : 169 ---

77. Wong têtanya wusing kardi | sapa (n)dadèkakên sira | pêksi krêndha lae lae | dewa nataning gambira | sabdaning guru nyata | dadi lawan dhèwèkipun | sêsana juluk satriya ||

78. Ngêndi ngong[24] Pangranirèki | prêkutut gung ya hu-Allah | kang pêsthi cinandu raos | iya iku ucapêna | kang angucap lan sira | patanyan gambirèng kutuk | sapa molahakên sira ||

80. Sawo sêmpal saupami | surya ratri diwangkara | saking ora wiwitane | mulaningsun dadi ana | lulungan wusing gêsang | êndi parane yèn lampus | tapas arèn ya hu-Allah ||

81. Latu mindha buntala di | ulih mara pan waluya | nulya kadya duk norane | Sana prabu kunir pita | jron pati nêmu apa | pêngantèn lagi pinagut | jujuluk putri Jênggala ||

82. Dene jroning pati iki | nora nêmu paran-paran | kang gula drawa dhuh lae | nata yaksa Purubaya | wuta tuli mukanya | bisa tan pêgat amuwus | lae ngêndi (ng)goning Suksma ||

83. Kang tata prana upami | pratapane sang Rahwana | ananing Hyang sayêktine | anglindhung ana ing cipta | srêngenge wus gumiwang | mênyan seta wus kadulu | ywa gingsir mawas kang nyata ||

84. Kang pari lagya kumêmping | parentah undhang prayoga | katungkul tata-kramane | marang muka ya hu-Allah | sela ginêniara | badan rêmpu pujinipun | kêlurung tambuh parannya ||

85. Pawijilan cacad ragi | kang tan mêtu marga-ina | wisangkara upamane | kang gêbang paniwêr wana | kalamun kababaran | ing wuwus tanpa gawèku | ya hu-Allah jambu alas ||

86. Jêmpana kang munggèng èsthi | aja kapok alêlana | teja muka kramèng katong | kumingsun kurang pracaya | putra ing Lesanpura | rêca kayu kang pinatut | golèka ujar kang sêtya ||

--- 6 : 170 ---

87. Toya rêka ya Ilahi | intên dèwi Drêsanala | mêtuwa gêni ujare | ing tutuk mangsa kandêla | kawuk citra upama | kulampis seta tan rikuh | kapilang dening sarira ||

88. Mangkana dènnira ngibing | si Sênu lawan gus Surat | lir binagi sarirane | jalu èstri kang tumingal | brantèng solah warnanya | lan swara busananipun | samya kedanan tênaga ||

89. Sawênèh ingkang jalwèstri | ingkang sampun ahli rasa | tyas kanyut ing parikane | kraos uripe nèng donya | tinitah langkung ina | lir winirang ing panutuh | pangolok-oloking Suksma ||

90. Tanpa guyu tanpa angling | kagagas ing pêparikan | pan wus dangu antarane | singir sèlèh ing sauran | tinampan ing wong kathah | saurane tarub agung | tarub agung Allah Allah ||

91. Pêngaubaning wong brangti | abrangti marang Pangeran | Pangerane alam kabèh | kêndhang anjujud irama | sêsêge kinêndhonan | ngandhêlong anulya suwuk | samya amaca sêlawat ||

92. Lèrèn pan angaring-aring | para santri sadayanya | aso sarwi asêsambèn | anginum wedang nyamikan | tan cuwa sasênêngnya | miwah ingkang nginang udud | nutug dhêdharan mawarna ||

93. Mangkana (n)Jêng Kyai Bayi | Panurta alon ngandika | dene bêcik parikane | lah iku sapa kang mulang | pêparikan kadyeka | apa bisa maunipun | Jèngraga umatur nêmbah ||

94. Punika pun Jamal Jamil | kang mulang suluk wangsalan | pan limrah tiyang bang kilèn | wangsalan tanah ing Karang | parikan dadya rasa | kang rama ngling lah ya iku | brêkate sabat uliya ||

95. Karênan ingong miyarsi | êmèle suluk wangsalan | kuciwa rada kasêron | trêbange lan saurannya | kakehan kang slawatan | kajaba mung trêbang têlu | sêtun santri sêlawe prah ||

96. Iku tatela kapyarsi | dadi nora na kang samar | ing raos tan ana kècèr | umatur kang para tuwa | pan inggih kasinggihan | Ki Pangulu manthuk-manthuk | nganthuki Sênu gus Surat ||

--- 6 : 171 ---

97. Kinèn maju ngarsanèki | manira duwe wangsalan | bêcik kinarya rêrêpèn | lah ta mara tampanana | ênggonên pêparikan | anyêlak gus Surat Sênu | bisik-bisik winarahan ||

98. Suda rêga pracayèngsih | macan galak gêgaweyan | tuna dungkap ing ngèlmune | nganggêp ujar boborongan | marus dyah gênthong lanang | durung ilang kadasipun | maksih sukêr anèng donya ||

99. Paran wus apil sirèki | sarwi mèsêm-mèsêm mojar | Ki Pangulu ing batine | saking kêpengin cêdhakan | Ki Pangulu aberag | aling-alinge mumuruk | mung cêdhak thok thil kewala ||

100. Sênu ngling mèsêm ngawêti | kagungan dika sap tangan | lan kêpêt kula suwune | kumbaya kusta langkung bang | kula rêmên kalintang | Ki Pangulu ngling karêpmu | ênya pundhutên priyangga ||

101. Sap tangan nulya ingambil | sumampir anèng wangkingan | Ki Basar sikute (n)dhosok | kêpêt sap tangan binêkta | mantêngah Sênu Surat | Ki Pangulu ginaguyu | Kulawirya latah-latah ||

102. Akale Ki Basarodin | kathik lir wong sakiyikan | kênan kêpêt sap tangane | daya-daya kêcanthèla | sikute nambutkarya | lèh thithik rong thithik lowung | urube kêpêt sap tangan ||

103. Kang myarsa gumujêng sami | Ki Bayi gumujêng nabda | sapa dèn-guguyu kuwe | umatur Ki Kulawirya | punika kakang Basar | anambut damêl bêbratu | kecalan kêpêt sap tangan ||

104. Angsal nyikut bokong kêdhik | Ki Bayi gumujêng suka | priye hèh Ngulu surupe | Ki Basarodin aturnya | kula mulang parikan | kalih wanda têmbungipun | wêwangsalan suda rêga ||

105. Ki Bayi mèsêm ling aris | parikamu kuna laya | ya bêcik lwih utamane | ngandika marang kang putra | Jèngraga santrinira | yèn wus aso payo gupuh | kang putra matur sandika ||

106. Lan kang raka Jayèngwèsthi | sarêng dènnya nyandhak trêbang | anglik bawa lan santrine | umyung swara rum araras | sajak cengkoke santak | lêlagon Jawa Lung-gadhung | sauranira mangkana ||

--- 6 : 172 ---

107. Sèmun kèring sèmun kèring | jare Allah Allah Allah | jalma wong tuwane jare | lanat agung ya hu Allah | hu Allah jare lanat | gung mas anggèr sira têmbung | nulya tinampan wong kathah ||

108. Kêlangkung gumuruh atri | abarungan tanpa runggwan[26] | trêbang kêndhang lan angklunge | pong ping pong pêk dhêng thung dhung brang | plak plak blang pyak prung pung bang | tong ting tong prig klur klur thir thur | thung plêk thung plêk bêng pyang pyang byang ||

109. Jayèngraga nulya nuding | Crêmasana Widiguna | kinèn emprak sigra jèngklèk | jogèd kêlana kasmaran | rupane karo pisan | lir nganggo topèng satuhu | salin rupane walaka ||

110. Ki Bayi gumujêng angling | si Crêma lan Widiguna | apa padha nganggo topèng | Jèngraga matur ing rama | duka dalêm punika | Jamal Jamil akalipun | manthuk-manthuk Ki Panurta ||

111. Wong roro dènnira ngibing | arakit sasolahira | nêlaskên cengkoking jogèd | pangêmbyake tan salaya | amiwir sondhèrira | kêkicatan tindakipun | pacak gulune ejlegan ||

112. Andhêglèg klêg oklak-aklik | hebat kumruwêl lir bahak | endha sinambêr ing kèkèt | kiprah kitrang kipat-kipat | ngling ngling bling ngling jênggigat[27] | agrudha babon nêladhung | kêsrug gidrah runyah-runyah ||

113. Ilo-ilo ngolang-ngaling | atindak lir katèl nêbak | manggêl kadung medong-medong | anggêdhindhang pêpincangan | dhêdhangkan lenggak-lenggok |[28] gêdrug-gêdrug nèmpèl[29] pupu | naricig sisirik manggang ||

114. Kêplok tangan angêtibing | mênthang bau asêblakan | nulya sêsêg lêlagone | semun keringira niba | ginunjang langkung santak | kang bêksa cêlana cancut | capêng lir arsa mangun prang ||

--- 6 : 173 ---

115. Anduduk kêndhang tinitir | anggobyog trêbang lir bêdhah | saking asru pênabuhe | angklung sêngkrak kadya gêrak | mangkana Jamil Jamal | anuduh pra bagoripun | kinèn emprak sadayanya ||

116. Nyêpêng corong siji-siji | bagor sêlawe prah emprak | maro rolas lir balane | kêlana sawijineka | agibrah kêkalangan | samya salin warninipun | kadya balane kêlana ||

117. Punggawa rupa mawarni | ting prêngangah rupa-rupa | kang sakêpêl babrêngose | kang godhèg wok akakaban | simbar dhadha sasagan | mukane lir topèng tuhu | ilang rupane wêlaka ||

118. Eram sakèh kang ningali | pratingkah ingkang tongtonan | kabèh pan katêmbèn tumon | (n)Jêng Kyai Bayi Panurta | kalangkung sukanira | yata kang emprak sadarum | rekane samya nglurug prang ||

119. Mubêng ing kalangan ngibing | ting jêlèmprak sarwi emprak | pêpanthan nèng wetan kulon | kabèh samya kêplok tangan | cawêdan tandang pêrang | Ginonjing gya tiba Liwung | saya sru trêbang sauran ||

120. Gumuruh gora rèh atri | sêsêg ngêtog rahabira | gya campuh kang emprak prange | arame bakar binakar | samya asêlomotan | sru nyunyuk sumbu-sinumbu | bar-bêr rame têlorongan ||

121. Aliwêran pasêr gêni | kang kêna tan pilih papan | kumaprês nèng rêraine | wangwa sumyur lir wêsi bang | pinalu kras mancurat | obor têlas lawan sumbu | anulya salin gêgaman ||

122. Pêdhang kalewang miwah kris | gigitik wêsi giligan | rit bapang talêmpak towok | gègèr giris kang tumingal | sadaya maras ing tyas | kabèh pra samya anêbut | kaya priye kuwe Allah ||

123. Nulya prang kêris-kinêris | myang pinêdhang kinalewang | bat-bêt kumêpruk swarane | kang pasah kang tan tumama | kang tatu gêlangsaran | sawênèh ana kang lampus | ludira adêladagan ||

124. Akathah warnining kanin | ana kang gulunya pagas | wênèh klèwèran ususe | gêrêng-gêrêng kalosotan | kêlana Crêmasana [Crêmasa...]

--- 6 : 174 ---

[...na] | balane sêdaya lampus | de kêlawan[30] Widiguna ||

125. Mung kanin kêdhik kang mati | gya kêlana Crêmasana | angamuk lawan kêrise | maju kinarubut bala | ngrêmpak ngiwung mrêjaya | têlas kang bala ingamuk | pan kantun sami kalana ||

126. sarêng majêng aprang tandhing | suduk sinuduk aramya | samya ajurira karo | rontang-ranting angganira | aniba kalih pisan | kalana ro pêjah sampyuh | pra bagor nêmlikur pisan ||

127. Samya pêjah anggulinting | sarta gêtih bêlabaran | myang kang klawèran ususe | gêrêng-gêrêng tan bisa bah | sakèhe kang tumingal | gawok samya jrih andulu | biyas ulate sêdaya ||

128. Tan tahan ningali jisim | akèh kalêngêr aniba | binayang marang sanake | trêbange mênêng priyangga | tan kanthi sinalahan | trêbang maksih pinangku |[31] anggantung ngungun tumingal ||

129. Kabèh tan ana cumuwit | jalwèstri gêgêtun samya | sidhakêp tutup cangkême | mangkana Ki Jamal Jamil |[32] ngadêg anèng kalangan | linuruban jisimipun | ujuring mayit tinata ||

130. Ronggèng ro kinèn angibing | nulya ngadêg Sênu Surat | Jamal bawa Siwal-molê | jujuluke Waliulah | Pangeran kang minangka | Nabi minangka jatiku | jatine tale wangsulan ||

131. Sinauran para santri | landhung samya lilirihan | lêlagone Parianom | lir nangisi kang palastra | rarase kang slawatan | ronggèng ro gus Surat Sênu | kinèn ngubungi[33] mayitnya ||

132. Jamal Jamil anèng wuri | sarwi ngangklung kalih pisan | nut wurine ing ronggèng ro | tibane sauranira | anulya Sênu Surat | sarêng ngêlik nganyut-anyut | lir nangisi kang palastra ||

133. Pênangise garwa siwi | kadya pulung kapipitan | asêndhêt-sêndhêt wilête | lir wong anyuling karipan | sambada parikan |[34] ana tangis layung-layung | tangise wong wêdi pêjah ||

134. Tangise wong wêdi mati | gêdhongana kuncènana | yèn wus pasthi nora wande | gya tinampan ing sauran | trêbang imbal ambalan[35] | lagune lirih alandhung | Sênu Surat Jamil Jamal ||

--- 6 : 175 ---

135. Samya angubungi[36] mayit | kumêlun kutug angambar | mangkana gêtih kang lèbèr | wus tan ana labêtira | ronggèng ro ngambil sêkar | saoncèn ing gêlungipun | winigar sinêbar-sêbar ||

136. Winratan lir nêbar wiji | sinawur kang kêmbang-kêmbang | sarwi sindhèn parikane | jatingarang mangsa kapat | jati têmahan mulya | mulya têmah sampurna wus | mulih lir wingi nguninya ||

137. Waluya ingkang basuki | bêdhug têlu atangiya | sucèkna badanmu lae | banyu saraban tauran | mujiya ing Pangeran | lah wis ayu ayu ayu | wong donya baliyèng donya ||

138. Kang mayit nulya ngalilir | krukube kabèh binuka | samya linggih dhêlog-dhêlog | Jamal Jamil kêplok tangan | Pari-anom aniba | nulya tangi kang alungguh | kinanthi ki Widiguna ||

367. Kinanthi

1. Pan lajêng emprak sadarum | mulya warnane pribadi | ting galidrah kiprah-kiprah | lir bungah matyurip malih | amubêng kadya angarak | pêngantèn Sênu Suratin ||

2. Sadaya bêksane bêsus | samya amberag birai | angêlètèr ing kalangan | sêsêg tibaning kang gêndhing | Cèlèng-mogok kinêplokan | umrêg kêploke gora tri ||

3. Sakèhe ingkang andulu | samya abungah tan sipi | [...] |[37] ambyong kêplok sadayèki | langkung rêmêning tanggapan | samya suka-suka ngênting ||

4. Santri sêlawatan umyung | Cèlèng-mogoke gora tri | wor barungan tanpa rowan[38] | kalangan kalangkung angrik | kêplok angklung kêndhang trêbang | sru natap anduduk nitir ||

--- 6 : 176 ---

5. Mangkana antara dangu | kêndhang duduke ngêndhoni | ngêndhêlong iramanira | sinalahan tan asari | gya suwuk maca salawat | kêsêl lèrèn ngaring-aring ||

6. Ki Bayi Panurta (ng)gugug | langkung sukanirèng galih | rongèh palinggihanira | sarwi ngandika hèh Luci | kaduga têmên tyasingwang | rame têmên lan duk wingi ||

7. Luci ature agupruk | dèdèk[39] kaote lan wingi | kaot mawi bêbagoran | Ki Bayi gumujêng ngikik | sasmita mring sadayanya | samya tumungkul ngèsêmi ||

8. Ngandika malih hèh cêblung | Widiguna dèn-mangarsi | lan si pothèt Crêmasana | gupuh samya majêng ngarsi | myang pra bagor wurinira | sadaya dèn-têtakoni ||

9. Priyê rasane awakmu | tatu kanti têkèng pati | matur tan wontên raosnya | mung kadya raosing arip | lir angantuk sacêklukan | langkung sêkeca tan sipi ||

10. Lah kang ora mati iku | gêrêng-gêrêng maksih kanin | matur kang samya liningan | tan wontên raosing sakit | kadya tindhihên kewala | liyêr lir wong dipuncandhi ||

11. Ki Bayi amanthuk-manthuk | ngungun myat ing Jamal Jamil | kêraos ing mantunira | idine Sèh Amongragi | ya wis mundura lèrèna | kêsêl sarèhêna linggih ||

12. Sadaya gya nêmbah mundur | wus tata dènira linggih | samya nutug nyênyamikan | sêgêran myang wedang kopi | wus aring dènira raryan | Kyai Bayi Panurta ngling ||

13. Jamal Jamil sira yèn wus | aso nuli wiwit malih | kang liningan tur sandika | Sênu Surat wus winangsit | kurungan pinasang têngah | rurubing sinjang mawarni ||

14. Sarta lan kutug kumêlun | sajèn-sajèn amêpêki | Jayèngwèsthi Jayèngraga | nyandhak tarêbangirèki | angêlik bawa sauran | swara barung rum amanis ||

--- 6 : 177 ---

15. La ilaha ilalahu | Muhamad habibullahi | tinampan ing santri kathah | rame rêmpêg naurani | trêbange ajêg atata | nut irama langkung asri ||

16. Wus rambah imbalanipun | nulya wau Jamal Jamil | lumêbu jroning kurungan | ronggèng ro ngubêngi ngêlik | anglir suling tinêrusan | gumrining angraras ati ||

17. Patra wisa wangsalipun | parang jajaning pawèstri | adhuh lae anèng donya | susukêre tan pinikir | paja-paja ing wardaya | mênyan seta ya Ilahi ||

18. Angên-angênên satuhu | awasêna ing ngaurip | puspa lulus ing astana | sêkar adi ing wiyati | têlas sihing maring raga | kalintang rasaning ati ||

19. Ya hu Allah sarah madu | kalpuka ngling srênggara ris | witning sun lamlam tilara | ing raga manira iki | mangkana sasindhènira | kang myarsa sumyar tyasnèki ||

20. Kasmaran mring Surat Sênu | mangkana Ki Jamal Jamil | dangu dènnya nèng kurungan | ingungkaban ronggèng kalih | kurungan suwung kewala | tan ana Ki Jamal Jamil ||

21. Tan antara praptanipun | nunggang sima Jamal Jamil | anggro sru (ng)gogodha gidrah | -gidrah krah krura ngajrihi | gègèr kagyat myat ing sima | kadya gabah dènintêri ||

22. Lêng-ulêngan lir pinusus | jalwèstri pating jarêlih | gusis kabèh kang jagongan | lumajêng samya awingwrin | santri kang narêbang bubar | tinuduh[40] sarwi lumaris ||

23. Slawatan sambi lumayu | Malarsih miwah parèstri | ambyuk lumêbu jro wisma | niba tangi rêbut dhingin | gugup saking jrih ing sima | kèh kajêngkang kajumpalik ||

24. Kèh singsal gendhonganipun | tuwa nom myang lare alit | kaidak-idak wong kathah | samya nangis ting jalêrit | sima nèng têngah kalangan | gulêt krah anggro gora ngrik ||

--- 6 : 178 ---

25. Lumumpat saut-sinaut | kèkèt sima agêng kalih | anggruwak têbak-tinêbak | milar anggro angajrihi | sadaya samya jrih mulat | Kyai Bayi jêlih-jêlih ||

26. Jamal Jamil lah wus-uwus | rucatên anggigilani | amêsakakên wong kathah | anak putu kèh bilai | raryalit kaidak-idak | wong nonton kèh kajumpalik ||

27. Nuli Jamal Jamil nuduh | angawe Sênu Suratin | ronggèng ro wus sinasmitan | samya maju marêpêki | kinêbyok kacu kumbaya | siji sowang angêbyoki ||

29. Sasaka rawa gêngipun | murub lir saka kabêsmi | kinarya prak nèng palataran[42] | ting gêrajug angubêngi | kang slawatan nut nèng latar | myang sadaya kang ningali ||

30. Samya tungtum andêdulu | Jêng Kyai lan garwa siwi | miwah sakucumbunira | nèng pinggir kidul ningali | sadaya ngadêg kewala | samya suka aningali ||

31. Kang angegrang gêni murub | bêburon gêbangan sikil | (n)dhêdhêgol ginol pagolan | bênthak binênthak agathik | latu lir wisma kabakar | kumêbul abra mratani ||

32. Nampêg wisma latunipun | kwèhning miyat ting jarêlih | e e priye kowe ika | sadaya tyase kuwatir | myat latuning payon ngambak | pandhapa gêdhongan masjid ||

33. Ki Bayi ngandika asru | wis wis amarasi ati | Sênu Surat nulya mara | udhête karya nyabêti | mati urube kang ègrang | kari wangwa egrang lari ||

34. Wus mêtu parane ngidul | Jamal Jamil tan kaèksi | kabèh wangsul ing pandhapa | akalangan tata linggih | akutug kumêlun ngambar | ronggèng singir ngalik-alik ||

--- 6 : 179 ---

35. Ngubêngi kurungan runtung | wangsalan andudud ati | kawis pita purwa kandha | pacing gunung myat ing wuri | aja pijêr bilulungan | tolèhên wêkasanèki ||

36. Singir sinauran barung | la ilaha ilalahi | Muhamadun kabibullah | angrantêg kêlangkung asri | tinampan Sênu gus Surat | swara rum raras mlasasih ||

37. Kawruh crita jêbug arum | baskara ngayomi ngardi | sarira surèng palagan | iribên suruping urip | paran padha mênyan pita | lakune kudu wirangi ||

38. Kang nèng jro kurungan wau | ngaruntêg kinèn ngungkabi | nulya kurungan binuka | sigra Jamal Jamil mijil | mabusana sarwa endah | sosotya nawa rêtnadi ||

39. Acalumpring kêlat-bau | gêlang kana anting-anting | kalpika kalung pamêkak | garudha jamang susumping | asondhèr kampuh cindhe bang | nyuriga nyêrapang katri ||

40. Sadaya kagèt andulu | panganggene Jamal Jamil | prabot katitik sadaya | kathah ingkang andarbèni | ana anitik cêrapang | ingkang nitik jamang sumping ||

41. Kang nitik cêlana kampuh | myang nitik badhong calumpring | kang nitik adêngongokan | sadaya pan ora pangling | kang dèn-angge Jamil Jamal | darbèke kang sugih-sugih ||

42. wontên satunggal wong dulu | pawèstri asru anangis | anake kang tinangisan | kidak-idak duk lumaris | rinubung ing sanakira | sasuwene durung eling ||

43. Ki Bayi ngungun amuwus | ya talah lare mlasasih | hèh bagus Ki Jamil Jamal | muga tulungên jêjampi | êndi kang nangis si bocah | prènèkna dèntêtambani ||

44. Nulya sinaoskên ngayun | pinaringkên Jamal Jamil | tinampan marang Ki Jamal | pinangku kang rare alit | kinurêpkên ing gêlaran | nulya nyandhak berang aglis ||

45. Rarywalit pinêdhang gêprus | sigra brak ludira mijil | sumêmbur nyiprat sumirat | biyunge ngêlumba anjrit | samya anjêlih kang mulat | biyunge sru nubruk bayi ||

--- 6 : 180 ---

46. Pinêdhang bêt salangipun | tigas pancing anggulinting | kagyat kang samya tumingal | salang surup tan mangêrti | samya alok nora trima | sanake samya (n)jrit nangis ||

47. Ki Bayi muwus rawat luh | priye kuwe Jamal Jamil | (ng)ko uga dadi prakara | jalwèstri samya sru angling | kèh ngarani kêsurupan | kabotan atine miring ||

48. Jamal Jamil kadya gêtun | sarwi anglurubi mayit | Sênu Surat sinasmitan | wis kinumpulkên kang mati | bêbayi lan biyungira | Sênu Surat angubêngi ||

49. Sarta ngambil sêkar gêlung | saonce winêdhar nuli | sinawurakên kang pêjah | ripangine lir nangisi | jatingarang mangsa kapat | mulyane kusuma jati ||

50. Jati têmahan mulya wus | pulih anglir wingi uni | bêdhug têlu atangiya | sucèkna badanireki | banyu saraban tauran | mujiya Pangranirèki ||

51. Lah wis ayu ayu ayu | wong donya balyèng donyèki | kang mayit anulya obah | tan dangu sigra ngalilir | mangku anak sinusonan | bayine wus waras-wiris ||

52. Anulya cinènèng mundur | mring sanake dèntangisi | wus lêga bungah sadaya | katongton gunane Jamil | Jamal Jamil nulya emprak | wong papat Sênu Suratin ||

53. Amubêng kalanganipun | kêplok tangan Jamal Jamil | lagone sabên bismillah | hi amana bismillahi | bismillahi hi amana | manalilah sajak Kawis ||

54. Barung kêndhang trêbang angklung | magênturan sru swara tri | kêndhang bêm agak sibêkan | angklunge bêbanggèn ngênthir | trêbang kêmpyange timpalan | pong ping pong pêk tong ting tong gring ||

55. Pêp pêp bah bah bah gur bah gur | plung plêk plung plêk brang prung prung bring | kêtong ting nguk dhêng dhung dhung brang | bêm pêk bêm pên[43] pung bêng pung bring | pyak pyak pyang plak blang pyak blang blang | klong klung thir thur klar klur thor thir ||

--- 6 : 181 ---

56. Jamal Jamil tandangipun | lir wong (m)begal mrih pêpati | kalewang ligan dèn-anggar | kot buta angigit-igit | ambujêng sawiji sowang | kinalewang sru ngendhani ||

57. Sru muwêng saking sru luput | sut-sut lir kitiran muni | binuru binahak-bahak | nulya kaprawasa kalih | thêl tugêl bêt kalih pisan | gulu pagas tibèng siti ||

58. Rahnya (m)balabar sumêmbur | waringutên Jamal Jamil | anulya pêdhang pinêdhang | samya pasahira kalih | sadhengah kang kêna gigal | suku bau tibèng siti ||

59. Sarêngan panyabêtipun | pancas gulunira kalih | sirah gêmbung tibèng lêmah | sirahe Sênu Suratin | anglik ro swara rum raras | kinanthi lagone aris ||

60. Ana tangis layu-layu | tangise wong wêdi mati | tangise alara-lara | maras atine yèn mati | gêdhongana kuncènana | yèn pêsthi tan wurung mati ||

61. Sinauran santri barung | alandhung swaranya lirih | lir ambarungi karuna | tarêbange ukur jawil | sirah ro ngesot lumampah | kadya kul kasatan ngalih ||

62. Lorah-lorah kosèr marus | lathinya nyakoti jarik | sirah ro atata wastra | gêmbung samya dènrurubi | ing lawon wus tan katingal | wangkene kang samya mati ||

63. Nulya sirah numpang gêmbung | akirap anggiting sari | oncène gêlung sumêbar | sumawur amêratani | ri pangilir waunèka | anutug satamatnèki ||

64. Sadaya kang andudulu | lir ngantuk sakêdhap arip | kumpuling gêmbung lan sirah | tan ana kang angudani | byar waspada wus waluya | Sênu Surat wuwuh manis ||

65. Lir winangun paèsipun | sangsaya ngimbuhi ati | enggar sadaya sukèng tyas | tan ana kang walang ati | puji-puji kang tumingal | mring Sênu bagus Suratin ||

66. Jamal Jamil Surat Sênu | dènnyemprak nuli alinggih | wus angumpul anèng ngarsa | ginobyong[44] trêbangirèki | sêsêg gumêr magênturan | anduduk kêndhang anitir ||

--- 6 : 182 ---

67. Sigêgên ing kêndhang kadung | ngandhêlong irama aris | praptèng gongan sinalahan | nulya suwuk tan asari | Ki Bayi alon ngandika | padha rèrèna kang aring ||

68. Anyampyêng babakanipun | iba kêsêle wong muni | umatur putra kalihnya | tan ngraos sayah sakêdhik | iba dangune babakan | swara malah saya wêning ||

69. Jèngraga ngumumkên wuwus | mara priye santri-santri | yèn beda kalawan ingwang | matur para lurah santri | alêrês atur paduka | malah kirang dangu malih ||

70. Pan limrah sêdayanipun | tan rêkasa dènnya singir | ènthèng sakeca kewala | duka dalêm ingkang mawi | (n)Jêng Kyai manthuk ris nabda | wis idhêp iku kang mawi ||

71. Iya si Jamal Jamilun | idine Sèh Amongragi | sasmita marang sadaya | samyandhêku matur aris | inggih sèstu kasinggihan | mantu dalêm ingkang mawi ||

72. Ki Bayi malih amuwus | marang sira Jamal Jamil | iku sajèn sadayanya | sira kang aduwe wajib | Jamal Jamil aturira | kalangkung nuwun kapundhi ||

73. Sih (n)Jêng Kyai pan kasuhun | Jamal muwus mring Nuripin | adhi Nuripin punika | sajèn-sajèn sadayèki | andika bage kang wrata | arta miwah jarit-jarit ||

74. Kang sami pangêdumipun | aywa na kang kaot sami | puniku ingkang pitêdhan | barêkahe Jêng Kiyai | dhi Nuripin lan pun kakang | Luci angêduma sami ||

75. Luci Nuripin abikut | angêdum arta lan jarit | myang panganan pinarutah | warata sadayanèki | tindhihira rolas reyal | wus pinanggih etangnèki ||

76. Pan pinara tigang atus | kaduman nyadasa dhuwit | sinjang ciyut ingkang wiyar | tinapsir rêginirèki | wontên ngalihi nyêkawan | ngênêmi myang nyêdasani ||

77. Kèhing sinjang sèkêt sasur | cacah ripênêd lan gêmbring | pan wus rampung pandumira | tan wontên kaot sakêdhik | Ki Bayi alon ngandika | busuk têmên Jamal Jamil ||

--- 6 : 183 ---

78. Pinalaur dèndum-êdum | nora dènambil pribadi | Jamal Jamil aturira | dene kados tiyang pundi | kawula botên (m)bêbarang | kewala namung ngladosi ||

79. Tan rumaos pênêd ulun | darmi kawula nglampahi | idinipun putra tuwan | ingkang kawula tuhoni | Ki Bayi aris ngandika | iya talah Jamal Jamil ||

80. Ngling malih mring putranipun | hèh Jayèngraga apa wis | sêdhênge padha madhangan | mèh thithik wus têngah wêngi | kang putra matur sêndika | angling mring Luci Nuripin ||

81. Takona si bapa yèn wus | olèhe ngrakit kêndhuri | Luci Nuripin gya mentar | Kêrtiraga dèndhawuhi | nulya angatag sinoman | nyarik dhadharan nèng ngarsi ||

82. Panganan sadaya dinum | barêkatanira sami | sinarang ing tapak dara | linorod ing panjang piring | sawusnya mundur sadaya | nulya kêndhuri mangarsi ||

83. Lêladèn pêngajêngipun | bêbucu nèng panjang giri | rampadan piring lancaran | saosanira Ki Bayi | putra kalih sarampadan | para ri samya ngalihi ||

84. Nulya (m)bêng kêndhuri pungkur | binayang tinata ngarsi | rolas ambêng wrat gotong-pat | kêndhuri jinèjèr tharik | ingkang moloni nyêdasa | ngrolasi ngênêmbêlasi ||

85. Ngrongpuluhi nêlung-puluh | sa-ambêng santri lit-alit | pinire dènnya kêpungan | sabêne sok ngrêrusuhi | Ki Luci sigra angatag | marang santri bocah cilik ||

86. Padha mangana rumuhun | sakêndhuri wus mêpêki | jangan pindhang bècèk ana | tan beda kêndhuri sami | takire jangan gênêpan | warata kabèh ngijèni ||

87. Aja nganggo wisuh-wisuh | (ng)gonên ngombe bae yèn wis | sumaur pra santri bocah | ngriku dèrèng sami wiwit | Luci nêntak sarwi ngatak | kêmyayi-pyayi si Juprit ||

88. Wis ta nocora dèn-gupuh | aja ngêntèni priyayi | ijih tangèh olèh dhahar | nulya santri alit-alit | tan kanti wisuh gya mangan | kokoh bècèk anèng takir ||

--- 6 : 184 ---

89. Lah ya mêngkono sing runtut | kurang lawuh ngong imbuhi | mung aja na rêrêbutan | ya ya yèn rusuh sirèki | dakcêmplungkên ing bêlumbang | rasakna (ng)ko ngong-sothoni ||

90. Santri alit mangan nutuk | sawiji takire (ng)goling | kasenggol kokohe utah[45] | amimisuh sarwi nangis | lon-ingilon sami bocah | cawuk-cinawuk samyanjrit ||

91. Dadya têtukaran umyung | mawut sêkul ulam ragi | gêdrah udrêg kêkapyukan | siratan jangan nèng takir | Ki Luci mingkar akêbat | karêpmu kono pribadi ||

92. Ki Bayi suka gumuyu | wus adate santri cilik | sabên mangan rêrêbutan | satêmêne mundhak asri | aku dèk cilik kèlingan | ya mêngkono nora pai ||

93. Sapuluh wong urip iku | lumintu tiru kang uwis | aku biyèn kala bocah | mêngko iki kaya kaki | wus mêngkono tan kêna ra | amênggilingan wong urip ||

94. Sabanjure tan kadyèku | mara yêktènana sami | yèn wong asih maring anak | utawa lyaning raryalit | dinulur warêdèn anak | kèh kêdhik tamtu basuki ||

95. Yèn ana wong larang tuwuh | iku labêting nora sih | maring anak myang lare lyan | utawa nora nganaki | sihe maring bocah padha | lan pawong mitranirèki ||

96. Tan gumantung nrusing kalbu | awèta dènnya mlas-asih | ewa-sêmono ya ana | mitra kang ngluwihi siwi | kèh-kèhe kawulaning Hyang | nanging arang wong kadyèki ||

97. Nadyan ana-a puniku | pêpancène kurang siwi | beda lan kang gêng trêsnanya | mring anak sêmpulur bêcik | mulane aywa candhala | bangêt-bangêt marang siwi ||

98. Sadaya samya tumungkul | Kulawirya matur aris | inggih lêrês kang timbalan | kawula matur mênawi | wontên kang kêrêng mring anak | pinêthès supaya bêcik ||

99. Sinabêt pinrih miturut | krêng punika kadospundi | punapa tan trêsnèng anak | kale wajib mêthès siwi | utawi rare kang (n)dhugal | purun tan wontên dènjrihi ||

--- 6 : 185 ---

100. Ki Bayi alon amuwus | basa kêrêng iku nanging | ana kêrêng nora trêsna | mring siwi kêrênge gêthing | dèn akêrênge wong trêsna | kur sasat mêdèni siwi ||

101. Batine masih angugung | sawadine dèn-turuti | mangkono wong trêsnèng anak | tansah tyas mung wêlasasih | pan iku lanang wadona | tan prabeda anglabêti ||

102. Ki Bayi malih amuwus | apa wis kang nglêladèni | yèn ana kang durung ana | umatur Luci Nuripin | pan inggih sampun sadaya | yèn wis payo padha wanting ||

103. Samya matur sandika wus | samya têturuh awijik | kang kokobok ngumbah tangan | adan lêkas samya bukti | jangan pindhang padhamara | bècèk lan êtim kêbiri ||

104. Myang ulam kang wutuh-wutuh | bêsêngèk bêkakak pitik | opor lan bêtutu banyak | sakèhe ulam mêpêki | pêksi ulam loh lan kewan | ingolah mawarni-warni ||

105. Kang samya nadhah anutug | rame kêcaping abukti | pangrêmêking krupuk sora | wor krêpyêking srundèng gêbing | pêncok lan kêdhêle rambak | balung nèm terong gêlathik ||

106. Gumalêthuk ting kariyuk | barung serop ting karêcip | Ki Bayi alon ngandika | aywa na kêsusu bukti | kang tamban enak-enakan | manira lagyantuk bukti ||

107. Jare jaman kuna iku | yèn mangan enak nyênyambi | karo angidung srênggara | lagon arum-arum manis | enaking iwak winastan | êndi ingkang dènsêptani ||

108. Kabèh gêntèn padha ngidung | mangkono jare dhèk dhingin | iku apa nora cêgah | sènggane ngidung rêrêpi | samya amatur sêdaya | sumanggèng karsa (n)Jêng Kyai ||

109. Ki Kulawirya umatur | ingkang punika mênawi | wadhaganipun kewala | pangraos kula prayogi | anggêr botên sêsajêngan | inggih sunat wênang mawi ||

110. Amrih rahabing majêmuk | lamun kagalih ing ngèlmi | inggih saèstu yèn cêgah | dalah rêrasan tan kenging | ewa punika binanda[46] [bi...]

--- 6 : 186 ---

[...nanda] | ngundur angalangi ngèlmi ||

111. Angyêktosakên pitutur | Ki Bayi nauri aris | ya enak kaolmu Wirya | mung myat lêlahan sami |[47] lah mara Gus Jayèngraga | ngidunga rum-arum manis ||

112. Padha gêntèna angidung | sapa kang bisa ngidungi | kang putra matur sandika | wusing nginum srêbat manis | amapan dènnira lênggah | nulya lêkas angrêrêpi ||

113. Angêlik rum-rum mintarum | kêcubung lara ngedani | ana barat sing lor wetan | mangulon paraning milir | silir-silir mambu ganda | gandaning wong anjêlanthir ||

114. Tumrape ulam kang mungguh | enake lêlawuh bukti | sing angolah sunbadheya | yèn iwaka iwak bancir | yèn woh-wohan jruk pacitan | yèn kêmbanga kêmbang gambir ||

115. Ki Bayi suka gumuyu | sadaya karênan myarsi | sêmbada swara rum raras | pra santri katêmbèn sami | nulya malih angandika | padha gêntèna mangrêpi ||

116. Jèngwèsthi angidung arum | tan pae lir Jayèngragi | mung kaot mastani ulam | mundhut sêptane pribadi | sing angolah sunbadheya | yèn iwak iwaka tagih ||

117. Yèn kêmbanga kêmbang mênur | yèn woh-wohan wohing manggis | nulya gantya ingkang paman | paman sadaya waradin | mastani sasêptanira | ana jambal miwah mrêsi ||

118. Kêlalèn lele lan talung | woh-wohan jambu jruk manis | salak dhuku lawan duryan | kêmbang kênanga mêlathi | argulo kalak cêpaka | (n)Jêng Kyai gumujêng angling ||

119. Kari sirèku Pêngulu | mara ngidunga kang bêcik | Ki Pêngulu aturira | botên sagêd angrêrêpi | punapa kenging sadhengah | ya sapintêrmu pribadi ||

120. Nulya dhèhèm Ki Pêngulu | swarane ngêlokor sêdhil | anggêrok lir wêdhus dumba | lir kêndhang (ng)gêbêbêr muni | ting pakênêng gulunira | angêlik sinom pêngrawit ||

--- 6 : 187 ---

121. Anggalêrêg grawul-grawul | pêngidunge Basarodin | gêgêthingku cilik mula | wong sidhêkah jênang baning | sêthithik yèn kirim donga | mangan enak nora micis ||

122. Pindhangipun kêmplung-kêmplung | alêga rasaning ati | ulame sêmada kathah | undhang-undhang mung sêthithik | amung brêkate tan ana | pêngaji sigar akêdhik ||

123. Gêr ginuyu sadaya rum | Kulawirya gumuywa ngling | dingarèn swarane ala | kang Pangulu Basarodin | lir tarêbang tan sinêntak | anggêbêbêr sabab sêdhil ||

124. Kang myarsa sarêng gumuyu | Ki Bayi gumujêng angling | dhasar ala cilik mula | kanti tuwa nora salin | Jayèngraga angandika | bêbisik mring Jamal Jamil ||

125. Ki Jamal sandika manthuk | (n)Jêng Kyai Bayi ngling malih | payo sasêlote mangan | sadaya kaecan bukti | Ki Pangulu dènnya nadhah | gumuyu kêkêl pribadi ||

126. Tinanya kang sandhing lungguh | wus uning pating guligik | Ki Bayi mèsêm tatanya | paran ingkang dèn-guyoni | dene tan kobêr amangan | (ng)guguyu mring Basarodin ||

127. Ki Pangulu Basar matur | punika (ng)gènkula bukti | sadhengah kang kula tadhah | botên kalong pulih malih | nulya samya tininggalan | kang cinuwil pulih malih ||

128. Ki Bayi myat suka muwus | priye kuwe Basarodin | (ng)gih duka dalêm punika | Kulawirya gumuywa ngling | coba opore sinêmpal | paran yêkti pulih malih ||

129. Kèh (n)dêngongok samya (n)dulu | mring Pangulu Basarodin | gya pukang opor sinêmpal | opor asru wak-wèk muni | kagyat Ki Pangulu Basar | sarwi angiling-ilingi ||

130. Dèn-ngêr-ingêr sarwi muwus | iki apane kang muni | dene wis matêng aenak | cocore pan wèk amuni | Ki Baywa nging[48] bok cinoba | opor gadhonên kang ênting ||

--- 6 : 188 ---

131. Ngrêmbagi sêdayanipun | gya Pangulu Basarodin | opor ginadho wus têlas | kari balunge balindhis | opor nèng jro wêtêngira | sangsaya sru wak wèk muni ||

132. Ki Pangulu gorèh bingung | swaraning bèbèk mêlingi | bênêr nèng jroning wêtêngan | mingak-minguk Basarodin | ginaguyu ing wong kathah | Pangulu gumuyu isin ||

133. Kulawirya majêng muwus | puniki Ki Basarodin | kula kurmat ingandika | kang tan mawi kêlak-kêlik | pindhang sakêda kang eca | Ki Pangulu ananggapi ||

134. Gya binuka tutupipun | akilêng pindhang kabiri | nulya pinêndhêt kang ulam | kumanug[49] mabur lumaris | mancal kêthune Ki Basar | sinampe tangan tan kenging ||

135. Dadya pèncèng kêthunipun | dadya pangguywan Ki Rodin | Ki Bayi suka ngandika | wis padha baginên aglis | kêndhuri gya cinarikan | ulam bêkakak binagi ||

136. Sadaya kang wutuh-wutuh | kang ngijèni angalihi | molu mapati nyadasa | sadaya sampun waradin | sinarang ing tapak dara | Ki Pangulu Basarodin ||

137. Ngijèni bêkakak wêdhus | pandumane Basarodin | ikêt kinarya saptangan | buntêl brêkat ambêthithil | kacupe wus siningsêtan | kumeyok brêkate muni ||

138. Ki Pangulu bêkah-bêkuh | biyang priye kiye iki | Kyai dospundi punika | sadaya ulame muni | bêkakak êmbak-êmbèkan | wak-wèk keyok bèbèk pitik ||

139. Gumuruh samya gumuyu | Ki Bayi gumuyu angling | lo êmbuh tan surup ingwang | manawa gus Jamal Jamil | iku marèkna mêningan | mêsakake Basarodin ||

140. Sawusnya (n)Jêng Kyai muwus | nulya cêp tan ana muni | Pangulu sakala bingar | wus tata brêkat miranti | gya winêdalan pawohan | myang rokok wangèn lininting ||

141. Wus samya nginang audud | Ki Bayi ngandika aris | Jèngraga ing kene sapa | kang bisa paramakawi | apa ana kang wus nêlas [nê...]

--- 6 : 189 ---

[...las] | ing têmbang têmbunge kawi ||

142. Jayèngraga nêmbah matur | ingriki wontên satunggil | namung pun Kaki Lawatan | saliyanipun tan uning | ingkang asring kêdhatêngan | sutèng priyayi nêgari ||

143. Sami mêrdhatêng mariku | kawula lan kangmas sami | kêdhik-kêdhik pan winulang | ki Baywa ngling tanya aris | pundi lèh (ng)gêguru paman | Lawatan matur Matawis ||

144. (n)Jêng Kyai Kêlipa Buyut | apan pujangga Matawis | kula duk anèm pruwita | manakawan mring (n)Jêng Kyai | kabêgyan sinung sih wulang | Ki Bayi mèsêm lingnya ris ||

145. Pan mênggah sêkar puniku | sadaya pintên kèhnèki | Ki Lawatan aturira | kathahipun sêkar kawi | kang jêjêr mung kawanwêlas | wiwit sawêlas winilis ||

146. Lêbdajiwa wastanipun | nuntên kalihwêlas malih | wastane Sumawicitra | nulya tigawêlas nami | Sudiradraka kawêkas | Basanta limalas nênggih ||

147. Mênggalagita rannipun | anuntên nêmbêlas malih | namane sêkar Gurisa[50] | wusing nêmbêlas anuli | pitulas kèhing aksara | nênggih sapada-lingsèki ||

148. Sikarini wastanipun | anuntên wolulas nênggih | nama sêkar Nagabanda | anuntên sangalas malih | ran Sardulawikridhita | nuntên kalihdasanèki ||

149. Sêkar Swandana rannipun | nuntên salikur winilis | Wisalya-arini rannya | nuntên kalihlikurnèki | Kilayunêdhêng wastanya | nuntên tigalikur nênggih ||

150. Wêgang Sulanjani nênggih |[51] nuntên sêlawe prah malih | pan sêkar Gandakusuma | punika kang ugêr sami | nanging mawi gêhandhokan | Lêbdajiwa kancuhnèki ||

151. Brêmara-wilasita wus | de Kusumawicitrèki | kancuh Candrawilasita | lan Wisati kandhêh nênggih | Madurêtna jangkêpira | de Sudiradraka nênggih ||

152. Dhadhap kancuhipun |[52] lan Alat-alat jangkêp tri | dene kang sêkar Basanta | mung kalih lan Puspanjali | kang sêkar Manggalagita | kancuh Sastramanggalèki ||

--- 6 : 190 ---

153. Lan Prana-alika uwus | kang sêkar Gurisa nênggih | kancuh Prawiralalita | dene sêkar Sikarini | akancuh Saprêtitala | kalawan Têpikawuri ||

154. Kawitana kalihipun | Maesabayangan tuwin | Bangsapatra jangkêpira | sêkar Nagabanda tuwin | mung kancuh Nagakusuma | dene ingkang sêkar malih ||

155. Sardulawikridhita mung | tan wontên gandhokanèki | dene kang sêkar Swandana | pan akancuh Sulanjari | lan Sasadara kawêkas | de sêkar Wisalyarini ||

156. Swaladara kancuhipun | sêkar Kilayunêdhêng ming | satunggil tanpa gandhokan | sêkar Wêgang Sulanjari | akancuh Kuswalalita | Astakusala jangkêp tri ||

157. Sêkar Gandakusumèku | mung Wohingrat kancuhnèki | punika ingkang kalampah | wontên lajêngipun malih | pitulikur Langênjiwa | nuntên sêkar Dhêndha nênggih ||

158. Tridasa-nêm lampahipun | Dhêndha-jiwa wastanèki | lampahipun sanga-sanga | ping pat sapada-lingsèki | wontên malih wolungdasa | Dhêndhapracandha ranèki ||

159. Gangsal-gangsal lampahipun | wontên sêkar Dhêndha malih | sangangdasa-nêm lampahnya | ngalihwêlas salingsèki | awasta Dhêndhabaswara | wontên sêkar Dhêndha malih ||

160. Satus-tigangdasa langkung | nênêm sapadalingsèki | lampahipun anyangalas | Dhêndha-prangwara namèki | wontên malih sêkar Dhêndha | satus-pitungdasa naming ||

161. Lampahipun ngalih-likur | Dhêndhapralêbda namèki | wontên malih sêkar Dhêndha | satus sangangdasa kalih | lampahipun nyalawe prah | Ulab-sisimparanèki[53] ||

162. wontên malih kang ingetung | pangkating sêkar Salisir | kang lampah pitu namanya | pan Citramêngêng Salisir | kang lampah nênêm punika | sêkar Swanita Salisir ||

--- 6 : 191 ---

163. Kang lampah wolu rannipun | Patralalita Salisir | kang lampah samya wastanya | pan Têbukasol Salisir | kang lampah sadasa rannya | Têbusauyun Salisir ||

164. Gunggunging sêkar gêng nêngguh | kawandasa-sanga naming | kang tumraping Kawiswara | kang sêkar Pramana-wingit | èngêt kawula punika | wa[54] mênawi wontên malih ||

165. Ki Bayi mèsêm amuwus | puniku paman dospundi | turene mawi wilangan | Ki Lawatan matur aris | inggih sèstu wiwicalan | kang lampah sawêlas nênggih ||

166. Mangkat sakawan gya pitu | jangkêp sawêlas winilis | ping sakawan praptèng pada | ingkang kalihwêlas nênggih | lampahipun tiga-tiga | Sumawicitra (n)darbèni ||

167. Candrawilasita nênggih |[55] papat-papat kaping katri | jangkêp kalih-wêlasira | Madurêtna lampahnèki | sami lan Wisatikandha | mangkat gangsal gya pitu wis ||

168. Kang tigawêlas ingetung | mangkat gangsal gya wolu wis | ping sêkawan têkèng pada | jangkêp sastra kang winilis | ingkang lampah kawanwêlas | angkat sêkawan ping kalih ||

169. Anuntên nêm jangkêpipun | ping pat praptèng padanèki | ingkang lampah gangsalwêlas | angkat wolu gya saptèki | ping pat jangkêp sapadanya | kang lampah nêmbêlas nênggih ||

170. Angkatipun wolu-wolu | ping pat jangkêp sapadèki | ingkang lampah pitu-wêlas | angkat nênêm kaping kalih | nulya gangsal jangkêpira | ping pat sapadanirèki ||

171. Sikarini ingkang laku | sami lan Têpikawuri | de kang sêkar Kawitana | lang[56] Mesabayangan sami | angkat gangsal gya nênêmnya | ping pat jangkêp sapadèki ||

172. Bangsapatra lampahipun | lan Sapratitala[57] sami | angkating ngajêng sakawan | nulya nêm gya pitu malih | pitulas sapadalingsa | ping pat jangkêp sapadèki ||

173. Kang lampah wolulas nêngguh | angkat gangsal gya nêm nuli | pitu jangkêp salingsanya | ping pat sapadanirèki | ingkang sêkar Nagabanda | lan Nagakusuma sami ||

--- 6 : 192 ---

174. Kang lampah sangalas gupuh | angkat nênêm kaping kalih | gya pitu jangkêp salingsa | ping pat sapadanirèki | ingkang lampah kalihdasa | Sasadra-kawêkas malih ||

175. Swandana sasaminipun | angkat pitu kaping kalih | nulya nêm jangkêping etang | ping pat sapadanirèki | Sulanjari lampahira | wolu gya nênêm ping kalih ||

176. Ping pat jangkêp sapadèku | sakalih-dasanirèki | mung kaot angkat kewala | nuntên lajêngipun malih | ingkang lampah salikurnya | angkat pitu-pitu ping tri ||

177. Ping pat jangkêp padanipun | lampah kalihlikur nênggih | angkatipun gangsal nulya | nêm ping kalih gangsal malih | ping pat jangkêp sapadanya | kang lampah trilikur nênggih ||

178. Angkatipun gangsal ngayun | nulya nênêm kaping katri | kaping pat jangkêp sapada | kang lampah salawe prah nênggih |[58] angkat nênêm ping sakawan | jangkêp ping pat sêpadèki ||

179. Ingkang sêkar pitulikur | angkat nênêm kaping kalih | nuntên wolu nulya sapta | ping pat jangkêp sapadèki | Ki Bayi alon ngandika | lah paman punapa taksih ||

180. Inggih liyane puniku | Ki Lawatan matur aris | wulange (n)Jêng Kyai kuna | Kêlipa Buyut Matawis | pangkating sêkar têngahan | Gapuh[59] kapisan kang dhingin ||

181. Angkating sastra ing ngayun | wolu dhawah wulu mêlik | gya wolu dhawah tarungan | gya pitu nglêgêna nuli | sadaya dhawah nglêgêna | sadasa nglêgêna malih ||

182. Gya wolu nglêgêna sampun | jangkêp sapadanirèki | wontên malih kang winastan | sêkar Gambuh kaping kalih | Gambuh ping kalih winastan | pan sêkar Kênya ping kalih ||

183. Angkat rolas dhawah suku | gya wolu dhawah wulu mlik | gya rolas dhawah sukunya | wolu dhawah suku malih | gya wolu dhawah nglêgêna | wolu[60] malih wolu[61] mêlik ||

184. Nulya sanga dhawah suku | gya wolu dhawah wulu mlik |

--- 6 : 193 ---

anulya wolu nglêgêna | gya rolas nglêgêna nênggih | padalingsane sadaya | jangkêp sapadanirèki ||

185. Dene Gambuh kaping têlu | angkate wolu wulu mlik | gya wolu dhawah tarungan | gya pitu nglêgêna nênggih | nulya pat dhawah sukunya | gya nêm dhawah wulu mêlik ||

186. Gya nêm dhawah taling-tarung | nulya wolu nglêgêna wis | apan mung nêm pada lingsa | jangkêp sapadanirèki | kang sêkar Gambuh kaping pat | angkate ngajêng winilis ||

187. Pitu dhawah suku mêndud | gya sêdasa suku malih | gya rolas dhawah wulunya | wolu dhawah suku malih | gya wolu dhawah tarungan | jangkêp gangsal sapadèki ||

188. Gambuh kaping lima nêngguh | pan dadi Kêdhiri malih | lampah angkatipun rolas | dhawah suku mêndud nênggih | nulya nêm dhawah nglêgêna | gya wolu dhawah wulu mlik ||

189. Nulya wolu dhawah suku | wolu malih wulu mêlik | gya wolu dhawah sukunya | gya wolu tarungan nênggih | namung pitung pada lingsa | jangkêp sapadanirèki ||

190. Lah malih kang sêkar Gambuh | kaping nêm winastan nênggih | sêkar Pamiwaltung rannya | angkat wolu wulu mêlik | gya wolu dhawah talingan | gya wolu tarungan nênggih ||

191. Sanga dhawah wulu sampun | mung kawan padalingsèki | pan jangkêp sapadanira | Gambuh kaping pitu nênggih | angkating sastra ingetang | wolu dhawah suku nênggih ||

192. Nulya pitu dhawah suku | gya kalihwêlas wulu mlik | gya wolu dhawah sukunya | lan wolu tarungan nênggih | namung gangsal pada-lingsa | jangkêp sapadanirèki ||

193. Ingkang sêkar Jurudêmung | lampahing sastra pangarsi | pan wolu dhawah nglêgêna | lan wolu pan suku nênggih | gya wolu dhawah sukunya | lan wolu nglêgêna nuli ||

194. Nulya wolu dhawah suku | gya wolu nglêgêna malih | lan wolu dhawah sukunya | jangkêp sapadanirèki | lan malih kang sêkar Lambang | angkating ngarsa pan sami ||

--- 6 : 194 ---

195. Wolu-wolu kaping wolu | sami nglêgênanirèki | dene sêkar Kuswaraga | angkat wolu tarung nênggih | lan wolu dhawah nglêgêna | nulya wolu wulu mêlik ||

196. Anulya nêm dhawah suku | gya wolu nglêgêna nuli | gya wolu dhawah wulunya | nulya wolu wulu malih | gya wolu dhawah nglêgêna | wolu dhawah suku nênggih ||

197. Wolung pada-lingsanipun | jangkêp sapadanirèki | wontên malih kang ingetang | apan sêkar Kuswarini | rolas dhawah suku nulya | nêm dhawah nglêgêna nênggih ||

198. Nulya wolu dhawah suku | gya wolu nglêgêna malih | gya wolu dhawah wulunya | wolu dhawah suku malih | gya wolu dhawah talingan | jangkêp sapadanirèki ||

199. Pitung pada-lingsa sampun | kang Kuswa-wirangrong nênggih | angkating sastra ingetang | angkat wolu wulu mêlik | gya wolu taling-tarungan | nulya nêm nglêgêna nênggih ||

200. Gya sêkawan dhawah suku | gya nêm dhawah wulu mêlik | lan pitu dhawah nglêgêna | myang wolu nglêgêna malih | wus jangkêp sapadanira | mung pitung pada-lingsèki ||

201. wontên malih ingkang ngetung | sêkar Kuswa-rangsang nênggih | wit rolas dhawah sukunya | gya nêm dhawah suku malih | anulya nênêm nglêgêna | wolu dhawah suku malih ||

202. Gya wolu nglêgêna nêngguh | wolu dhawah wulu mêlik | gya pitu dhawah wulunya | wolu dhawah suku nênggih | namung wolung pada-lingsa | jangkêp sapadanirèki ||

203. wontên malih ingkang ngetung | kang sêkar Maesa-langit | angkating sastra pangarsa | kalihwêlas dhawah taling | gya pitu dhawah sukunya | nulya wolu wulu mêlik ||

204. Wolu malih taling tarung | wolu taling-tarung malih | namung gangsal pada-lingsa | jangkêp sapadanirèki | de kang sêkar Palugangsa | angkating ngarsa winilis ||

205. Wolu dhawah taling-tarung | nulya nêm nglêgêna nênggih | gya wolu dhawah talingan | rolas dhawah taling malih | gya sanga dhawah sukunya | nulya wolu wulu mêlik ||

--- 6 : 195 ---

206. Nulya wolu dhawah wulu | mung pitung pada-lingsèki | wus jangkêp sapadanira | de sêkar Palugon nênggih | angkating sastra pangarsa | wolu dhawah wulu mêlik ||

207. Wolu malih taling-tarung | wolu taling-tarung malih | lan wolu dhawah nglêgêna | wolu dhawah suku nênggih | wolu dhawah wulu nulya | wolu malih dhawah taling ||

208. Wolu malih taling-tarung | mung wolung pada lingsèki | wus jangkêp sapadanira | de sêkar Mêgatruh nênggih | pan angkat rolas sukunya | nulya wolu wulu mêlik ||

209. Wolu malih dhawah suku | wolu malih wulu mêlik | lan wolu taling-tarungan | mung gangsal pada-lingsèki | wus jangkêp sapadanira | sêkar Maskumambang nênggih ||

210. Angkat rolas dhawah wulu | nulya nêm nglêgêna nuli | gya wolu dhawah wulunya | lan wolu nglêgêna malih | namung kawan pada-lingsa | jangkêp sapadanirèki ||

211. Dene ingkang sêkar Pocung | angkat rolas suku nênggih | nulya nêm dhawah nglêgêna | gya wolu dhawah wulu mlik | gya rolas dhawah nglêgêna | pat pada-lingsa (n)jangkêpi ||

212. Kang sêkar Bêlabak nêngguh | angkat papat-papat ping tri | gya tiga dhawah talingan | mung tri pada-lingsa sami | wus jangkêp sapadanira | têlas sêkar têngahan nis ||

213. Kathahipun sangalikur | sêkar têngahan puniki | kang sêkar kidung macapat | kawit sêkar Dhandhanggêndhis | sadasa dhawah wulunya | sadasa nglêgêna nênggih ||

214. Wolu dhawah talingipun | nulya pitu suku nênggih | gya sanga dhawah wulunya | lan pitu nglêgêna nuli | apan nêm dhawah sukunya | gya wolu nglêgêna malih ||

215. Nulya rolas dhawah wulu | gya pitu nglêgêna nênggih | pan sadasa pada-lingsa | jangkêp sapadanirèki | kang sêkar Asmaradana | angkat wolu wulu mêlik ||

216. Gya wolu nglêgêna nêngguh | wolu dhawah mure taling | anulya wolu nglêgêna | myang pitu nglêgêna malih | gya wolu dhawah sukunya | myang wolu nglêgêna malih ||

--- 6 : 196 ---

217. Mung pitung pada-lingsèku | jangkêp sapada-lingsèki | kang sêkar Pangkur ingetang | pan wolu nglêgêna nuli | sawêlas dhawah wulunya | wolu dhawah suku nênggih ||

218. Gya pitu nglêgêna nêngguh | nulya rolas sukunèki | anulya wolu nglêgêna | wolu malih wulu mêlik | namung pitung pada-lingsa | jangkêp sapadanirèki ||

219. Kang sêkar Sinom ingetung | wit wolu nglêgêna nênggih | gya wolu dhawah wulunya | lan wolu nglêgêna nuli | gya wolu dhawah wulunya | nulya pitu wulu mêlik ||

220. Nulya wolu dhawah suku | lan pitu nglêgêna nênggih | gya wolu dhawah wulunya | gya rolas nglêgêna nênggih | namung sangang pada-lingsa | jangkêp sapadanirèki ||

221. Kang sêkar Durma ingetung | wit rolas nglêgêna nuli | gya pitu dhawah wulunya | nulya nêm nglêgêna nuli | gya pitu dhawah nglêgêna | wolu dhawah wulu mêlik ||

222. Gya gangsal nglêgêna nêngguh | gya pitu dhawah mulu[62] mlik | pitung pada-lingsanira | jangkêp sapadanirèki | kang sêkar Mijil ingetang | wit sêdasa wulu mêlik ||

223. Nulya nênêm taling-tarung | gya sêdasa dhawah taling | sadasa dhawah wulunya | anulya nêm wulu malih | nulya nêm dhawah sukunya | amung nêm pada-lingsèki ||

224. Wus jangkêp sapadanipun | dene kang sêkar Kinanthi | wit wolu dhawah sukunya | nulya wolu wulu mêlik | gya wolu dhawah nglêgêna | wolu malih wulu mêlik ||

225. Gya wolu nglêgêna gupuh | wolu dhawah wulu mêlik | wolung pada-lingsanira | jangkêp sapadanirèki | inggih punika lampahnya | sêkar-sêkar sadayèki ||

226. Têlas kang macapat kidung | namung pitu kathahnèki | gunggunge sadayanira | Dhêndha kawi myang Salisir | têngahan kidung macapat | wolungdasa-gangsal nênggih ||

227. Ki Bayi suka ing kalbu | myarsa ing kidung kêkawin | nahwune kang sastra Jawa | têmbung lan têmbang ginati | Ki Bayi Panurta suka | mèsêm angandika aris ||

--- 6 : 197 ---

228. Si paman Prênjana luhung | nyata yèn wus alim Jawi | suwawi paman Lawatan | (n)dika nêmbang Sulanjari | Ki Lawatan tur sandika | ngalêsêd ngewahi linggih ||

229. Dhèhèm watuk sêmu-sêmu | mapanakên swaranèki | mèsêm mathêt atrapsila | tangane sidunwèng wêntis | dumancunging dhêsthar tinrap | nulya nêmbang Sulanjari ||

230. Ulone landhung amuluh | rêmêk[63] gêng mêmbat rum manis | gèdhèg lenggok gulunira | mayog-mayog lambungnèki | dariji gênah wilangan | angkat wolu nêm ping kalih ||

231. Sri Karna kasrêg inirup | sinêp linêpasan nênggih | warastra pinarêk dira | ngadêg mamuling anuli | ngawe ri laruting bala | lara rêbah ngajêngnèki ||[64]

232. Bima ngêbak lêpas amuk | tiningalanira nênggih | mabat gajah rata bêntar | trênyuh sing inarung nuli | tinêmbungira ring gada | kasulayah jangkêpnèki ||

233. Ki Bayi suka gumuyu | nora jamak paman iki | swara sêdhêngan kêpenak | wong wis tau nèng nêgari | kaprigêlane abeda | têmbang-têmbunge amathis ||

234. Mandahne nom-nomanipun | tuwa-tuwa maksih (n)dhandhing | dhuh paman sapisan êngkas | kula kasupèn sakêdhik | sêkar Sasadra-kawêkas | sami kalih-dasanèki ||

235. Kadipundi kaotipun | Sasadra lan Sulanjari | Ki Lawatan nulya nêmbang | swara wilête ginambi | mèh raina sêmu bang Hyang |[65] Haruna kadi netraning ||

236. Angga rapuh lajêngipun | gya sabdani kokila ring | kanigara lajêngira | gya sakêtêrni kidung ning | akung lwir wuwusing nulya | wini panca papêtêking ||

237. Ayam wana lajêngipun | ring pagakan lajêng malih | gya mrak anguhuh[66] brêmara | angrêbasa kusuma ring | para haswana rum purna | jangkêp sapadanirèki ||

238. Mèsêm Ki Bayi amuwus | enak Sasadaranèki | jaman mangkono [mangko...]

--- 6 : 198 ---

[...no] lir paman | Lawatan wong nêmbang Kawi | aja kaya Widiguna | mung Gurisa pintêrnèki ||

239. Padha mareneya cêblung | pra dhalang kang pramèng ringgit | sira padha (ng)gugurua | mring paman Lawatan bêcik | Crêmasana Widiguna | Widilêksana Thrur[67] Krucil ||

240. Dhalang pan gupuh mangayun | cêlaking Lawatan nênggih | Ki Bayi tanya hèh Guna | sirèku dhalang Matawis | êndi asalmu padesan | Widiguna matur aris ||

241. Matawis dhusun ing Bantul | nênggih Bantul Bantul Kawis | sirèku apa ta dhasar | nak putuning dhalang ringgit | umatur Ki Widiguna | won-awon inggih naluri ||

242. Pan kêbanton marasêpuh | sami dhalang purwa saking | wiji ing Jodhog Lipura | marasêpuh kula nguni | turuning dhalang Dalêman | Ki Lêbdapura kang nami ||

243. Yèn mangkono sira iku | tabon pêdhalangan yêkti | kandêl dalilmu Kabudan | apa kabèh padha luri | kajaba si Crêmasana | asli wong Wanamartèki ||

244. Ki Widilêksana matur | kawula saking Bahrawi | yêktosipun asli Pajang | pun bapa nama Ki Rêdi | -tata turun Citralata | dhalang bagor dalêm nguni ||

245. Tinanya Ki Thur umatur | kawula saking Kadhiri | yêktose asli Blambangan | mila turun dhalang krucil | anama Êthur kewala | katêlah dalasan mami[68] ||

246. Sadaya sami umatur | sami asli saking têbih | rèhning tiyang nistha dama | pados têdhaning nak rabi | sapikantuking pajiwa | têmah katrêm anèng ngriki ||

247. Kêraos sami pikantuk | saking gêng bêrkah (n)Jêng Kyai | dhangan ing sakedah-kedah | sami kaangsalan bukti | nêng Wanamarta tyas cipta | kandhêm kèrêm anèng ngriki ||

248. Ki Bayi ngling iya sokur | sira kaolèhan budi | puku[69] paman Lawatan | prayogi kawulang Kawin[70] | kang dhalang gêdhog nèh wulang | Mênggalang Ditawatangi ||

--- 6 : 199 ---

249. Lah paman wawi tinêmbung | Mênggalangipun dospundi | Ki Lawatan aturira | Mênggalang punika Mijil | inggih makatên ungêlnya | nulya Ki Lawatan wiwit ||

250. Swara rum mijil Sang Prabu | saking jro puri anênggih | lampahira alon nulya | ginarêbêg lajêngnèki | ing dyah abayak kèh endah | wanodya lir widadari ||

251. Sang Prabu ya lajêngipun | pêkik lir Asmara nuli | nuntên jangkêp sapadanya | Ki Bayi ngandika aris | wawi paman Ditawatang | Ki Lawatan amiwiti ||

252. Anggalêndêm swaranya rum | Hyang Candra purnama murti | pinangka Dipa anulya | ning wêngi lajêngirèki | lintang araras kumênyar | jaladara dipaning sih ||

253. Katrangan padyating nêngguh | kilat thathit ajêngnèki | anarnatèng limut nulya | riris andulur lan nênggih | lan imur rum ning mulat gya | surat-sari jangkêpnèki ||

254. Ki Bayi mèsêm lingnya rum | mara lah tirunên iki | iku (ng)gon-anggoning dhalang | wajib (ng)guguru kang bêcik | dhalang mono sing pralêbda | dadi manira lèh bathi ||

255. Padha pakolèhirèku | wajib prêlu amrih bêcik | mundhak kapintêranira | anggunggung kang anitèni | kuncara ing kana-kana | dhalang Wanamarta bêcik ||

256. Ingkang liningan tumungkul | nêmbah umatur nuwun sih | mangkana antaranira | (n)Jêng Kyai ngandika malih | lah payo padha bubaran | arib siyang nambut-kardi ||

257. Tur sandika sadaya wus | kang jagongan mundur mulih | Jèngwèsthi lan para paman | bodhol sarèrèhanèki | Ki Bayi malêbèng wisma | lênggah tanya mring Malarsih ||

258. Lah êndi iki putramu | bagus pêngantèn Mongragi | matur putra Ni Turida | maksih sênêt nèng panêpin | wau kala wêktu dhahar | kawula ken nitik sêpi ||

259. Tan wontên sabawanipun | samya jrih ingkang ngaturi | pan sinaosan kewala | Ki Bayi ngandika aris | lah ya wis akamdullilah[71] | payo mulih Ni Malarsih ||

--- 6 : 200 ---

260. (n)Jêng Kyai anulya kondur | lan garwa Nikèn Malarsih | ingiring sarencangira | santri Luci anèng ngarsi | anggawa êtinge gêlas | gumarudug magêrsari ||

261. Tuwin Kiyai Pangulu | luk salam sumimpang margi | samya mulih sowang-sowang | yata kang kantun pandhapi | sira kimas Jayèngraga | lan paman Kulawiryèki ||

262. Jèngraga aris amuwus | wawi paman talu malih | awon nganggur piyambakan | Ki Kulawirya nauri | lah ya karo karêpira | manira têka umiring ||

263. Kang putra malih amuwus | paman mênawi marêngi | ngagêma têkês prayoga | kang paman gumuyu nuli | la ngagêm têkês cèplêsan | angling maring santri-santri ||

264. Padha lungguha kang têpung | wus ombèr papane linggih | bagor magêrsari mapan | miwah para santri-santri | kang nonton maksih akathah | kêdhik ingkang sami mulih ||

265. Sangsaya pakolèh (n)dulu | Jayèngraga ngandika ris | punapa gêndhinge paman | suwawi bêksa lan mami | Kulawirya lon ngandika | Pêtung-wulung gya Ginonjing ||

266. Ki Jayèngraga amuwus | miwiti lêlagon singir | ngêling[72] ngunkung tumlawungan | la ilaha illalahi | Mukamadun Rasullolah | nulya santri naurani ||

267. Gumêr rêmpêk swara barung | nganyut-anyut langkung asri | nulya ngadêg Sênu Surat | anyarimpi ronggèng kalih | Jayèngraga trêbangira | pinaringkên gus Arpani ||

268. Nulya jumênêng sang bagus | kalawan Kulawiryèki | ambêksa rangin Mataram | pra bagor kêplok mawanti | amiwir sondhèr araras | sèdhêt amacak rêspati ||

269. Acandhang asta ngêrajung | angikal ukêl titinggil | jariji gêtêr kêjêran | amanggêl tangjêg narisik | ahebat sarpa kadhangan | ambuncang kunca kumitir ||

270. Angridhong grudha nêladhung | amênthang mêthènthèng

--- 6 : 201 ---

kadi | sawung sawangan tarungan | anyimpar mêrak kasimpir | angigêl parigêl manggal | lambung angula ngêlangi ||

271. Sinêmbadèng Surat Sênu | narimpi ringgit sarimbit | rumakêting kawilêtan | malulut umalat ing sih | anglèngèk mungsêr nèng ngarsa | sisirig ting-tingan ngênting ||

272. Amêthêt kêclap sumêmprung | mamprêng ngalêtêr ngidêri | sumrêpêt nindur tilapan | prêt-uprêtan prapta lari | sang priya anglir mardangga | sinambêr ing kèkèt kêsit ||

273. Lumarap angudêr nindur | tumèmplêk caplêk ngijèni | Ki Jayèngraga gus Surat | Sênu Ki Kulawiryèki | amênthang asta andhêngklang | nêngkah lambung lambang liring ||

274. Amungsêr pagolan pupu | mêmêtêk amathêt lathi | isthanira lir amothah | kathah ature kumanthil | sang priya ro lir kalana | ngalaga jayèng prang tandhing ||

275. Tinanggalèng garwanipun | manusul atawan tangis | sumamar ing tyas sih marma | eman manawa sor jurit | mangkana raras èsthanya | sindhèn anglik lir nangisi ||

276. Priyanya kadya tan kengguh | pêpagol malang ing wêntis | tan watos tètèsing tiwas | ngamêr-amêr ing garwa sih | sêlahing jangga ling-lingan | asangkut buburon liring ||

277. Kumalepat sênthot mundur | akalangan langên ngêlik | ronggèng ro pêncar asimpar | sindhèn saplak tan sarênti | tuwin kêcaping parikan | rêrekan wangsalan sami ||

278. Dhuh kusuma apisadu | cêlore dènwor lan liring | srênging karsa pasugata | lun-aluning saya dadi | karêpe dènladènana | sêmune kalangkung brangti ||

279. Siti rêngka gayung sumur | gêgêlang munggèng dariji | katula nora lèh tamba | lali uripe kinardi | bayantaka linggar sana | dening kênure undhagi ||

280. Srat pêpacak kang ginadhuh | sipating dhat[73] nora mati | kewala ngalih panggènan | tirtamaya ya Ilahi | supana loro parannya | êningna tyas ywa nimpangi ||

--- 6 : 202 ---

281. Lalu mangsa margèng ciyut | panusuling magut jurit | kasèp rupak bantu brangta | barat sira ya Ilahi | pasewakan jro nayaka | pupusên driyanirèki ||

282. Mangun harja jayèng-ranu | kang tinut sabarang kardi | pantês baya angawula | nata-dewa wrêksa aking | kursi lawak sikil dênta | (ng)gurua paraning pati ||

283. Gagak bang salin pandulu | wana lit pinggir pasisir | tulung dudu kêtêbira | sarah madu bibis tasik | pan jarene wong awirya | lamun kondur ing swarga di ||

284. Nutug dènnya bêksa alus | gêndhingan niba ginonjing | acancut serong sarigak | asondhèr kawêng ubad[74] ji | bubuntar li wangsulan |[75] adhupak gagah tan wigih ||

285. Tangjêg cengkok cèkèh kukuh | sarêng tandangira kalih | para bagor ngadêg samya | kêploke gaprok mawanti | agobyog kang trêbang kêndhang | angklung sêngkrak umrês ngênthir ||

286. Pong pêk prong brung klur klur thir thur | cruk cruk crak krok kling bêng pung gring | tung plêk tung plêk pak blang pak blang | pyak pyak bêm pêp brung pêp brung bring | kêtèngtèng nguk pêp pêp bah bah | bah gur bah gur tong ting tong gring ||

287. Samya ngantêp sukanipun | barung dalah kang ningali | sarta kêndhange kinêmpyang | angklung wor kêplok gora tri | Crêmasana Widiguna | wong roro samya (m)badhuti ||

288. Kang bêksa nutug sakayun | nêlas rekane pêngibing | ambapang mênthang andhêngklang | ukêl tapis angêngibing | ahebat garudha kagyat | ngaricik ngijig sisirig ||

289. Nyanguk nyangkluk pacak-gulu | èjègan klêk oklak-aklik | asta kipat gêtêr kadya | pêthiting sarpa kêpipit | ngêbyak gidrah runjah-runjah | angêdhindhang ngolang ngaling ||

290. Umaju bandhil anyurung | ngadêg ngindha-indha jêglig | anêrècèt kicat-kicat | cing-cag kêcingcag anjinjing | angglong lir tungkak kaborang | ilo-ilo aliliring ||

--- 6 : 203 ---

291. Anggiwar wêr muwêr kêsrug | srisig srêg sinrêg tan srênti | anjingklak nglênggak andhangak | langak-langak alilingik | atindak banyak-nyiluman | gêdrug lingak-linguk miling ||

292. Sisiring surungan ujung | ajêng-ajêngan ngajoni | langkung ramening abêksa | samya rahabira kalih | kêplok sênggak babanggenan | kang ningali suka ngênting ||

293. Sami katêmbèn andulu | dèrèng miyat kang kadyèki | tongtonan sasore mula | milane tan ana arip | akathah paraning suka | tuwin myat ing Jayèngragi ||

294. Abagus bêksane alus | sakathahe kang parèstri | pra pêrapat manca-lima | warandha lanjar dudungik | salong somahan acipta | samyajrak[76] tan nêdya mulih ||

295. Dadia pangobèngipun | mawongan mring Jayèngragi | nora kudu binalanja | mung ginapeya bae wis | sadayèstri pan mangkana | sêngsêm maring Jayèngragi ||

296. Kang abêksa dangu anut | luwaran dènnira ngibing | tarêbang gobyog sêsêgan | anduduk kêndhang tinitir | sapratêloning irama | ngêndhêlong suwuking gêndhing ||

297. Samya lèrèn sadaya wus | tata dènnira alinggih | winantu sugatanira | pateyan myang wedang kopi | miwah nyamikan mawarna | prayoga lir sorenèki ||

298. Jèngraga aris amuwus | payo kono sanak santri | padha sêsambèn nyamikan | sakarine inganipis | sadaya matur sandika | samya nyamik ngaring-ngaring ||

299. Jèngraga malih amuwus | prayogi nutug saratri | yèn wus aring rèrènira | pra bagor ngibing agênti | têtomboke angrong uwang | lan sapa kang dhangan ngibing ||

300. Yèn wus ngibing kang alungguh | nuli wong (n)jaba kang ngibing | padha atomboka nyuwang | mêngko pajar bae uwis | Widiguna ambadhuta | wong roro (n)jênêngi ngibing ||

--- 6 : 204 ---

301. Mundhuta bokor dèn-gupuh | Ripin lan mundhuta dhuwit | rong reyal bolong dèn-enggal | Nuripin tan dangu prapti | wus katur bokor myang arta | dinèkèk têngah pandhapi ||

302. Kulawirya tombokipun | sreyal winor ing bokor wis | warata parentahira | jawi lêbêt wus miranti | berag sadaya kang nêdya | angibing mawi nomboki ||

303. Dènnya samya lèrèn nutug | Jayèngraga ngandika ris | yèn wis lah payo lêkasa | sapa kang miwiti ngibing | anjaluka gêgêndhingan | sasênêngira pribadi ||

304. Kang bawa gêndhing gya talu | gêndhing manut kang (n)jaluki | rame mindhak rahabira | trêbang kêndhang angklung ngênthir | wor sru swaraning sauran | pangêliking ronggèng kalih ||

305. Mangkana sadangunipun | kang angibing gênti-gênti | tan winuwus solahira | yata kang anèng ing masjid | panêpèn Sèh Amongraga | ingkang (ng)girisakên ngèlmi ||

1	Lebih satu suku kata: lahi ngaléka mangkono. (kembali) Lebih satu suku kata: lahi ngaléka mangkono.
2	§ Prayoginipun \| husniko \|. (kembali) § Prayoginipun \| husniko \|.
3	§ Pethikan kitab Maulud Syarifu'lanam, kaca 36 (Serat Centhini Pisungsung kaca 259). (kembali) § Pethikan kitab Maulud Syarifu'lanam, kaca 36 (Serat Centhini Pisungsung kaca 259).
4	§ Prayoginipun \| anjejegi \|. (kembali) § Prayoginipun \| anjejegi \|.
5	sajabaning. (kembali) sajabaning.
6	Kurang satu suku kata: angguguwa mring sirèku. (kembali) Kurang satu suku kata: angguguwa mring sirèku.
7	makmum. (kembali) makmum.
8	§ Kakathahên sawanda, prayoginipun \| Jèngwèsthi \|. (kembali) § Kakathahên sawanda, prayoginipun \| Jèngwèsthi \|.
9	§ Prayoginipun \| imam \|. (kembali) § Prayoginipun \| imam \|.
10	§ Prayoginipun \| isbandiyahipun \|. (kembali) § Prayoginipun \| isbandiyahipun \|.
11	§ Prayoginipun \| lapal hu hu \|. (kembali) § Prayoginipun \| lapal hu hu \|.
12	§ Prayoginipun \| ajsan \|. (kembali) § Prayoginipun \| ajsan \|.
13	§ Prayoginipun \| mimi \|. (kembali) § Prayoginipun \| mimi \|.
14	§ Prayoginipun \| Mujadah \|. (kembali) § Prayoginipun \| Mujadah \|.
15	trus. (kembali) trus.
16	Kurang satu suku kata: brang pêp pêp bah bah gur bah gur. (kembali) Kurang satu suku kata: brang pêp pêp bah bah gur bah gur.
17	Kurang dua suku kata: angatak kang nonoman. (kembali) Kurang dua suku kata: angatak kang nonoman.
18	Biasanya guru lagu e(o): malèh. (kembali) Biasanya guru lagu e(o): malèh.
19	Kaywaking (dan di tempat lain). (kembali) Kaywaking (dan di tempat lain).
20	Lebih satu suku kata: gumuliling nèng layapan. (kembali) Lebih satu suku kata: gumuliling nèng layapan.
21	Kurang satu suku kata: angulêt sumbu-sinumbu. (kembali) Kurang satu suku kata: angulêt sumbu-sinumbu.
22	Lebih satu suku kata: nèng salang myang kandhutan. (kembali) Lebih satu suku kata: nèng salang myang kandhutan.
23	§ Prayoginipun \| traté \|. (kembali) § Prayoginipun \| traté \|.
24	§ Prayoginipun \| (ng)gon \|. (kembali) § Prayoginipun \| (ng)gon \|.
25	Biasanya guru lagu a. Soeradipoera (1912–5): êndi gon kang dhihin pisan (Pupuh 47.79.7). (kembali) Biasanya guru lagu a. Soeradipoera (1912–5): êndi gon kang dhihin pisan (Pupuh 47.79.7).
26	rungwan. (kembali) rungwan.
27	§ Prayoginipun \| jêngginggat \|. (kembali) § Prayoginipun \| jêngginggat \|.
28	Biasanya guru lagu a: lenggak-lenggak. (kembali) Biasanya guru lagu a: lenggak-lenggak.
29	§ Prayoginipun \| nampèl \|. (kembali) § Prayoginipun \| nampèl \|.
30	§Prayoginipun \| kelana \|. (kembali) §Prayoginipun \| kelana \|.
31	Kurang satu suku kata: trêbangé maksih pinangku. (kembali) Kurang satu suku kata: trêbangé maksih pinangku.
32	Biasanya guru lagu a: mangkana Ki Jamil Jamal. (kembali) Biasanya guru lagu a: mangkana Ki Jamil Jamal.
33	§ Prayoginipun \| ngubengi \|. (kembali) § Prayoginipun \| ngubengi \|.
34	Kurang satu suku kata: sambada pêparikan. (kembali) Kurang satu suku kata: sambada pêparikan.
35	imbalan. (kembali) imbalan.
36	§ Prayoginipun \| angubengi \|. (kembali) § Prayoginipun \| angubengi \|.
37	Kurang satu gatra: 8a. Soeradipoera (1912–5): gumêdêr gumuyu gumrah (Pupuh 48.3.3). (kembali) Kurang satu gatra: 8a. Soeradipoera (1912–5): gumêdêr gumuyu gumrah (Pupuh 48.3.3).
38	§ Prayoginipun \| rungwan \|. (kembali) § Prayoginipun \| rungwan \|.
39	§ Prayoginipun \| dédé \|. (kembali) § Prayoginipun \| dédé \|.
40	§ Prayoginipun \| tinabuh \|. (kembali) § Prayoginipun \| tinabuh \|.
41	Biasanya guru lagu i: sagantangan pan ainggil. Soeradipoera (1912–5): sagantangan inggilnèki (Pupuh 48.28.6). (kembali) Biasanya guru lagu i: sagantangan pan ainggil. Soeradipoera (1912–5): sagantangan inggilnèki (Pupuh 48.28.6).
42	§ Prayoginipun \| plataran \|. (kembali) § Prayoginipun \| plataran \|.
43	pêk. (kembali) pêk.
44	ginobyog. (kembali) ginobyog.
45	wutah. (kembali) wutah.
46	§ Prayoginipun \| binandha \|. (kembali) § Prayoginipun \| binandha \|.
47	Kurang satu suku kata: mung miyat lêlahan sami. (kembali) Kurang satu suku kata: mung miyat lêlahan sami.
48	§ Prayoginipun \| ngling \|. (kembali) § Prayoginipun \| ngling \|.
49	§ Prayoginipun \| kumanuk \|. (kembali) § Prayoginipun \| kumanuk \|.
50	Girisa. (kembali) Girisa.
51	Biasanya guru lagu u: nêngguh. (kembali) Biasanya guru lagu u: nêngguh.
52	Kurang dua suku kata: Dhadhapmantêp kancuhipun. (kembali) Kurang dua suku kata: Dhadhapmantêp kancuhipun.
53	§ Prayoginipun \| Ulab-samparan namèki \|. (kembali) § Prayoginipun \| Ulab-samparan namèki \|.
54	(m)bok. (kembali) (m)bok.
55	Biasanya guru lagu u: nêngguh. (kembali) Biasanya guru lagu u: nêngguh.
56	lan. (kembali) lan.
57	Saprêtitala. (kembali) Saprêtitala.
58	§ Kêkathahên sawanda, prayoginipun \| slawé \|. (kembali) § Kêkathahên sawanda, prayoginipun \| slawé \|.
59	§ Prayoginipun \| Gambuh \|. (kembali) § Prayoginipun \| Gambuh \|.
60	§ Prayoginipun \| wulu \|. (kembali) § Prayoginipun \| wulu \|.
61	§ Prayoginipun \| wulu \|. (kembali) § Prayoginipun \| wulu \|.
62	wulu. (kembali) wulu.
63	rempeg. (kembali) rempeg.
64	§ Pada 231-232 lan pada 235-237 punika pethikan Brata-Yuda Kakawin (Serat Tjentini Pisungsung). (kembali) § Pada 231-232 lan pada 235-237 punika pethikan Brata-Yuda Kakawin (Serat Tjentini Pisungsung).
65	§ Pada 231-232 lan pada 235-237 punika pethikan Brata-Yuda Kakawin (Serat Tjentini Pisungsung). (kembali) § Pada 231-232 lan pada 235-237 punika pethikan Brata-Yuda Kakawin (Serat Tjentini Pisungsung).
66	anguwuh. (kembali) anguwuh.
67	Thur. (kembali) Thur.
68	nami. (kembali) nami.
69	§ Prayoginipun \| puniku \|. (kembali) § Prayoginipun \| puniku \|.
70	§ = Kakawin. (kembali) § = Kakawin.
71	alkamdulillah. (kembali) alkamdulillah.
72	§ Prayoginipun \| ngelik \|. (kembali) § Prayoginipun \| ngelik \|.
73	§ Prayoginipun \| dat \|. (kembali) § Prayoginipun \| dat \|.
74	§ Prayoginipun \| ubed \|. (kembali) § Prayoginipun \| ubed \|.
75	§ Prayoginipun \| bubuntar tali \|. (kembali) § Prayoginipun \| bubuntar tali \|.
76	§ Prayoginipun \| samyanjrak \|. (kembali) § Prayoginipun \| samyanjrak \|.

Penanggalan

Leksikon

Telusuri

Cênthini, Kamajaya, 1985–91, #761 (Jilid 06: Pupuh 365–367)

Pencarian Teks

365. Gambuh

366. Asmaradana

367. Kinanthi