1841-04-15 - Sasradiningrat kepada Residen Surakarta

Ringkasan: Seorang bernama Samenggala dari Karangdawa diperlukan sebagai saksi masalah candu gelap, supaya dipanggil untuk datang ke Surakarta. Sasradiningrat memerintahkan kepada R. Rangga Warsakusuma, setelah dicari ke alamatnya, orang tersebut sudah tidak ada, maka laporan dari Rangga Warsakusuma juga dikirimkan kepada residen.

Atur tabe kula saha kaurmatan akathah-kathah, Kangjêng Radèn Adipati Sasradiningrat. Katur kangjêng tuwan mayor ridrê sangking ing Nèdrêlansê Leyo, residhèn ing Surakarta Adiningrat.

Sasampuning kadya punika wiyosipun. Kula sampun anampèni sêrat pêparingipun kangjêng tuwan residhèn, ingkang katitimangsan ing Surakarta kaping 7 wulan April taun 1841, ingkang mungêling sêrat, wontên têtiyang Jawi satunggil anama pun Samênggala, griyanipun siti dhusun Akawispanjang, ingkang dados sêksi prakawis cêmêngan pêtêng, wontên ing kantor, punika pamundhutipun kangjêng tuwan residhèn. Mugi kula utusan animbali têtiyang Jawi wau, dhatêng ing nagari Surakarta.

Ingkang punika atur wangsulan kula ing kangjêng tuwan residhèn. Mênggah prakawis têtiyang ingkang nama pun Samênggala, ingkang agêgriya ing dhusun Kawispanjang, ingkang kalêbêt dados sêksi prakawis cêmêngan pêtêng, wontên ing kantor, punika kula sampun anglampahakên sêrat dhawah, dhatêng Radèn Răngga Warsakusuma, ing Kêbonrama, animbali tiyang ingkang nama pun Samênggala wau, aturipun Radèn Răngga Warsakusuma, mênggah siti dhusun ing Kawispanjang

sampun dipun pariksani ananging tiyang ingkang nama pun Samênggala wau sêpên botên wontên ing salamènipun.

Wondening sêrat aturipun Radèn Răngga Warsakusuma, prakawis gènipun animbali pun Samênggala wau, kula aturakên ing kangjêng tuwan residhèn. Asarêng kalihan sêrat kula punika, ingkang mugi kapariksaa, kula sumăngga panggalihipun ing kangjêng tuwan residhèn.

Katur ing kantor Kêmis tanggal kaping 23 wulan Sapar ing taun Wawu ăngka 1769.